राष्ट्रिय निकुन्ज तथा वन्यजन्तु संरक्षण विभागको अझै ढङ्ग पुगेन, किन झारामात्रै टार्न खोजेको?

– राजु आचार्य –

गत मार्च १५ मा ‘वन्यजन्तु सम्बन्धि निकायले वन्यजन्तु नै चिन्दैनन् नेपालमा’ भन्ने शीर्षकमा माइसंसारमा ब्लग लेखियो। ब्लगलाई सेयर गर्ने मध्ये एक श्याम लोप्चन को फेसबुकमा वन विभागका कर्मचारी रितेश बस्नेतले प्रतिकृया जनाए ‘दुई रूप्पेमा एक दर्जन पाइने ब्लगका दुई पैसे बकम्फुसेले ब्लगलाई चर्चित बनाउन रचेको भद्दा कथा हो।’ उनले यसलाई भद्दा कथा भने पनि, ब्लगमा उल्लेखित प्रसंगहरु असत्य हुन् भन्ने प्रमाण यिनीसँग थिएन।

उनले दुई पैसे भनेको ब्लगको प्रभावको बारेमा यिनलाई थाहै रहेनछ। भर्खरै मात्र राससले बिना इजाजत प्रयोग गरेका फोटोहरुको कुरा होस् वा राष्ट्रिय गानको धूनका सर्जक तथा आधुनिक नेपाली संगीतका खम्बा अम्बर गुरुङको उपचार खर्चको कुरा होस् वा अख्तियारले फेसबुकमा विज्ञप्ति सच्याएको प्रसङ्ग होस्, वा बेलबारी काण्डबारे नेपालका मुख्य सचिवको चासो सबैमा माइसंसारको भूमिका थियो भन्ने कुरा उनले बुझ्नु अघि नै विभागले आफ्नो वेबसाइटलाई बन्द गरिसकेको थियो।

हेर्नुस बन्द हुँदाखेरीको वेबसाइटको स्क्रिनसट-

युवा तथा पुराना संरक्षणकर्मीहरुले फेसबुकमा प्रतिक्रिया जनाए, ‘कम्तिमा वेबसाइटमा गलत जानकारी त मेटिने भो।’ जर्मनीबाट प्रेमराज न्यौपानेले विभागको यो कामलाई धन्यवाद पनि दिए।

केही दिनपछि विभागले वेबसाइटलाई परिमार्जन गर्दै खोल्यो, तर तस्विरहरु हटाएर। अहिले यो लिङ्कमा क्लिक गर्नुभयो भने http://www.dnpwc.gov.np/protected_species/species/mammals यसपाली प्रजातिका नामहरु मात्र छन् तर तिनका सबै फोटोहरु हटाइएको छ।

यसपालि झन् नेपालमा संरक्षित स्तनधारीमा हुँडार र जंगली चौरीगाई हटाएर अन्य प्रजातिहरुको नाम मात्र उल्लेख छ। एउटा नयाँ प्रजाति समेत थपिएको छ ‘गोरवड्सन’ जुन कुन प्रजाति हो थाहा भएन।

चराको सुचिमा ‘चुनाल’ भन्ने चरा अझैसम्म उल्लेख छ। घस्रने प्रजातिहरुको सुचिमा केही पनि छैन, जबकी तीन वटा प्रजातिहरू हुनुपर्थ्यो। सुधार्नका लागि प्रयास गरिसके पछि अलि राम्रोसँग त गर्नु पर्छ नि ! किन झारा टारेका होलान् ?