विश्वकै अग्लो ठाउँमा हिउँदेखि नडराई दौड्नेहरुको फोटो हेर्नुस्

दौड्ने काम त्यसै पनि सजिलो हैन। गोरखामा त्यही भएर दौड जित्नेलाई राजा बनाइन्थ्यो। अहिले राजा त बन्न पाइँदैन, तर पुरस्कार भने पाइन्छ। अहिले यहाँ गर्न लागेको चर्चा कुनै चानचुने दौडको होइन। यस्तो दौड संसारमै कहीँ हुन्न। अर्थात् सबैभन्दा उचाइमा हुने म्याराथन। यत्तिकै दौड्दा त गाह्रो हुन्छ भने हिउँ नै हिउँ भएको सगरमाथाको फेदमा दौड्दा कस्तो होला? आउनुस् हेरौँ आयोजकबाट प्राप्त केही गजबका फोटोहरु।

तेन्जिङ र हिलारीले सगरमाथाको चुचुरोमा पाइला टेकेको दिनको स्मृतिमा १२ औँ पटक यस्तो म्याराथन आयोजना गरिएको हो। यो दौड सगरमाथा आधार शिविर अर्थात् ५ हजार ३६४ मिटरको उचाइमा सुरु हुनुपर्ने थियो। तर भारी हिमपातका कारण ठाउँ त्यहाँबाट ५ किलोमिटर अगाडि नै निधो गरियो।

मुख्य प्रतिस्पर्धामा सँधै झैँ नेपालीहरु नै विजयी भए। सुदीप कुलुङ राई पहिलो भए भने भीमबहादुर गुरुङ र सुमन कुलुङ राई दोस्रो र तेस्रो भए।

महिलातर्फ पनि नेपाली नै विजयी भए। आङ छुटिन शेर्पा पहिलो, मिङमा ल्हामु शेर्पा दोस्रो र ल्हाहाक फुटी शेर्पा तेस्रो भइन्।

विदेशीतर्फ पोल्यान्डका दुई जना पहिलो र दोस्रो भए भने बेलायती तेस्रो भए।