फोटो अफ दि डे : गृहमन्त्री बादलको दयाहाङ राईवाला ‘लुक्स’, टोपी लगाएर तातोपानी अनि पुत्त निस्केको पेट

१५ वर्षअघि म्याग्दीको सदरमुकाम बेनी चर्चामा थियो। अहिले फेरि बेनी चर्चामा छ। १५ वर्षअघि माओवादीले सयभन्दा बढीको ज्यान जाने गरेर गरेको आक्रमणले बेनीको चर्चा राष्ट्रिय अन्तर्राष्ट्रिय रुपमा भएको थियो। अहिले चाहिँ त्यतिबेलाका माओवादी नेताहरु तातोपानीमा डुबेका फोटोहरुले बेनी चर्चामा छ। द नर्थ फेस लेखेको टोपी लगाएर तातोपानीमा तत्कालीन माओवादीका सैन्य कमान्डर र हालका गृहमन्त्री बादल डुबेको फोटो हिट छ सोसल मिडियामा। बादलको अर्को फोटो पनि हिट छ। यो फोटोमा पुत्त निस्केको भुँडी छाम्दै गरेका बादल कलाकार दयाहाङ राई जस्तै पो देखिएका छन्।

उहिले र अहिलेको तुलना खासमा नगरे हुन्छ। द्वन्द्वका कुरा सम्झिराख्ने नै हैन। सम्झियो भने लहरो तान्दा पहरो झर्छ। कहाँ राज्यविरुद्ध लडेका माओवादीका प्रमुख नेताहरु। कहाँ राज्यकै गृहमन्त्री र सरकारमा रहेको पार्टीका अध्यक्ष। त्यतिबेला माओवादीले बेनीमा आक्रमण गरी झण्डै १२ घण्टा कब्जामा लिएका थिए। अहिले भने राज्यसत्ता पूरै हातमा हुँदा पनि बेनी नगरपालिकामा पर्ने तातोपानीमा मंगलबार जम्मा ३ घण्टामात्रै कब्जा गर्न सके। बिहान साढे नौ बजेदेखि ११ बजेसम्म र दिउँसो ३ देखि साढे ४ बजेसम्म यी भिआइपीहरु नुहाउने भएकोले अरुलाई त्यहाँ नुहाउन र जान दिइएको थिएन।

नेपाली सेनाको हेलिकप्टर चढेर गृहमन्त्री पत्नीमात्र हैन बहिनी ज्वाइँसहित आएका रहेछन्। त्यसैगरी प्रचण्डसित छोरी र पत्नी छन्। सोसल मिडियामा चर्चा चाहिँ फोटोकै छ। कुण्डमा नुहाउँदा अरुलाई जान दिइएको थिएन। भनेपछि भिआइपीकै आसेपासेले फोटो खिचेका हुन्। यस्तो बिजोगको फोटो खिच्न चाहिँ किन अनुमति दिँदा रहेछन् नेताहरुले?

दिवंगत भइसकेका सुशील कोइरालाकै उदाहरण हेरौँ। उनी प्रधानमन्त्री हुँदा कन्याएकोदेखि लुङ्गी लगाएकोसम्मका फोटो खिचेर उनकै आसेपासेहरुले फेसबुकमा हालेका थिए (बिर्सनुभएको भए पुरानो ब्लग हेर्न यता क्लिक गर्नुस्)

अहिलेको फोटो पनि कम छैन। गृहमन्त्री जस्तो मान्छे, यसो सचिवालयमा एक जना प्रोफेसनल फोटोग्राफर राख्नु, राम्रो फोटो खिच्ने। उसले खिचेका फोटोहरुलाई राम्रोसँग एडिट गरेर मिडियामा दिनु। आफ्नै छवि राम्रो हुने काममा चाहिँ खर्च गर्न किन कञ्जुस्याइँ गर्छन् होला कुन्नि। अनेक थरिका खर्च राज्यकोषबाट लिन्छन्, यस्तोमा पनि लिन त मिल्छ होला नि।

सत्तारुढ नेकपाका अध्यक्ष प्रचण्डको पारा पनि उस्तै हो। उनको आफ्नै साइटले यस्तो फोटो राखेको थियो-

प्रचण्डकी श्रीमती त बिचरी बिरामी छिन्। छोरा प्रकाशको मृत्यु भएदेखि उनको स्वास्थ्य अवस्था बिग्रेको थियो। पत्नीकै लागि प्रचण्ड तातोपानी आउनु ठीकै हो। तर यी गृहमन्त्री चाहिँ तीन तीन दिन किन बेनीमा बस्नुपरेको होला। अरु केही काम नभएर तातोपानी कुन्डमा भुँडी देखाएको, टोपी लगाएर डुबेको फोटो सार्वजनिक गर्नलाई त पक्कै हैन होला। उनी र उनको परिवारलाई कुनै रोग लागेको त थाहा छैन हामीलाई।