यसपालि मुस्ताङ घुम्न जाँदा ठाउँठाउँमा अञ्जु पन्तको पोस्टर भेटियो। मुक्तिनाथ मन्दिरबाट झोङ जाने बाटोमा रहेको सुनसान गाउँमा समेत पोस्टर टाँसिएको रहेछ। ‘न बिर्सेँ तिमीलाई, न पाएँ तिमीलाई, बिना अर्थ दिलमा सजाएँ तिमीलाई…’ गीतले चर्चाको शिखरमा पुगेकी गायिका हुन् अञ्जु पन्त। जम्मा साढे १३ हजार जनसंख्या भएको त्यसमाथि पनि धेरैजसो जाडो सुरु हुन थालेकोले मुस्ताङबाट अन्यत्र झरेकोले जिल्लाभरमा ५ हजारको हाराहारीमा जनसंख्या भएको मुस्ताङमा कन्सर्ट? अचम्म लागेर पोस्टर नियालेर हेरेँ। अझ प्रवेश निःशुल्क समेत लेखिएको रहेछ।
