भात खाँदाको फोटो भाइरल

सामाजिक सञ्जाल पनि अचम्मैको हो। भात तपाईँ हामी सबैले खान्छौँ। दिनमा एक छाक मात्र हैन दुई छाकै खान्छौँ। तर तपाईँहामीले खाएको भातको फोटो भाइरल हुँदैन। आज आइतबार भने भात खाँदाको फोटो सामाजिक सञ्जालमा भाइरल भइदियो। फोटोमा दुई वाम नेताले एकै ठाउँमा भात खाएको देखिन्थ्यो। नेताले पनि भातै खाने हुन् भनेर जनताले भर्खर थाहा पाएको त हैन होला पक्कै। अनि किन भाइरल भएको त यो फोटो? एकता टुक्रिन लाग्यो भनेर चलिरहेको चर्चका बीच ‘ता’ मात्रै उतातिर गएको हो दुई नेता भात त एकै ठाउँमा खाने गरी ‘एक’ छन् भनेर देखाउनलाई होला यो फोटो सार्वजनिक गरिएको। सोचे अनुसार नै भाइरल भइदियो।

फोटोमा झापाको बी एन्ड सी मेडिकल कलेजका साहु दुर्गा प्रसार्इ पनि देखिन्छन्। उनको भक्तपुरको थिमिमा गजबको बंगला छ। दुई नेता त्यहीँ बसेर भात खाइरहेका रहेछन्। फोटोमा एक जना बच्चाको पनि हात देखिन्छ, को हो सामाजिक सञ्जालमा समेत कसैले चिनेनन्।

ओलीले चम्चा काँटाले खाने, प्रचण्डले हातले खाने थाहा पाएर हो कि मार्सीको भात देखेर हो- जनता त्यसैत्यसै रमाएर भाइरल हुनपुग्यो फोटो।

नेताले भात खाएको फोटो रोचक नै हुन्छ हेर्नेलाई। केही अघि माधव नेपालले अमेरिका भात खाएको फोटो पनि सामाजिक सञ्जालमा खुबै हिट भएको थियो।

माधव नेपाल २०६४ सालको संविधान सभा निर्वाचनमा हारेपछि दक्षिण कोरिया घुम्न गएका थिए। त्यहाँ पनि उनले खाएको भिडियो त्यो जमानामा माइसंसारमा राखिएको थियो