समानुपातिकमा विवेकशील साझाको केन्द्रमा जमानत जफत, प्रदेश ३ को प्रदेशसभामा भने तीन सिट पाउने

उज्ज्वल थापा नेतृत्वको पुरानो पार्टी विवेकशील नेपाली दल र रवीन्द्र मिश्र नेतृत्वको नयाँ साझा पार्टी एकीकरण भएर बनेको विवेकशील साझाको नारा यस पटक राष्ट्रिय दल र अर्को पटक देशको नेतृत्व थियो। तर राष्ट्रिय दलका लागि चाहिने दुई शर्त एक प्रत्यक्ष सिट र समानुपातिकमा देशभरबाट तीन प्रतिशत मत ल्याउन नसकेपछि यो दल राष्ट्रिय मान्यता प्राप्त दल हुनबाट चुकेको छ। यो ब्लग तयार पार्दासम्म समानुपातिक मतगणना अन्तिम चरणमा पुगिसकेको छ र यो दलको मतप्रतिशत २.२ प्रतिशतमात्रै छ। मतगणना बाँकी रहेका जिल्लाबाट उसले खासै धेरै मत ल्याउन नसक्ने भएकोले केन्द्र अर्थात् प्रतिनिधि सभामा यो दलको प्रतिनिधित्व नहुने निश्चित भएको हो। अर्थात् यो दलको केन्द्रमा जमानत जफत हुनेछ।

प्रतिनिधि सभा सदस्य निर्वाचन ऐन २०७४ अनुसार समानुपातिक निर्वाचन प्रणालीमा कम्तिमा एक सिट नजित्ने दलको धरौटी जफत हुनेछ।

समानुपातिकको बन्दसूची बुझाउन ५० हजार रुपैयाँ बुझाउनु पर्छ। एक सिट पनि नजित्ने विवेकशील साझा लगायत बन्दसूची बुझाउने ४४ वटा दलको जमानत जफत भएको छ।

विवेकशीललाई प्रदेश ३ को सभामा भने तीन सिट
प्रतिनिधि सभामा समानुपातिकबाट सिट नल्याए पनि विवेकशीलले प्रदेश नम्बर ३ को प्रदेश सभाबाट भने तीन सिट जित्न सफल भएको छ। निर्वाचन आयोगले मतगणना सकिसकेको भनेपछि आयोगको साइटमा राखिएको प्रदेश ३ को मत अनुसार विवेकशीलले यहाँको प्रदेश सभामा ६.६ प्रतिशत मत ल्याएको छ। प्रदेश सभामा १.५ प्रतिशतको मात्रै थ्रेसहोल्ड छ। यो मत अनुसार प्रदेश सभा सदस्य निर्वाचन ऐन २०७४ को मत परिणाम विभाजक सूत्र अनुसार हिसाब गर्दा विवेकशीलले तीन सिट पाउने देखिएको हो।

को निर्वाचित हुन्छन् त विवेकशीलबाट?
विवेकशीलले निर्वाचन आयोगमा प्रदेश सभा ३ को लागि बन्दसूचीमा १४ जनाको नाम पठाएको थियो। आयोगले औपचारिक रुपमा यो दलले तीन सिट जितेको घोषणा गरिसकेपछि कम्तिमा ३३ प्रतिशत महिलाको प्रतिनिधित्व हुने गरी अन्य जातजातिको समेत प्रतिनिधित्व हुने गरी सूची पठाउन भन्छ।

विवेकशीलले बुझाएको सूची यो हो। यसैमध्येबाट तीन जना निर्वाचित हुनेछन्-

प्रदेश सभाको चौथो ठूलो दल
नयाँ भए पनि यो दल राजधानीसमेत रहेको प्रदेश सभामा चौथो ठूलो दल भएको छ भने पुराना दलहरु नेपाल मजदूर किसान पार्टी, राप्रपा र नयाँ दलहरु नयाँ शक्ति, राप्रपा प्रजातान्त्रिकलाई जितेको छ। नेमकिपाले प्रत्यक्षमा १ र समानुपातिकमा १ गरी दुई सिट जितेको छ भने राप्रपाले समानुपातिकमा एक सिट मात्रै जितेको छ। त्यस्तै नयाँ दल नयाँ शक्तिले रसुवामा एक सिट मात्रै प्रत्यक्षबाट जितेको छ। राप्रपाबाट टुक्रिएको राप्रपा प्रजातान्त्रिकले पनि समानुपातिकबाट एक सिट मात्रै जितेको छ।

यस्तो हुनेछ प्रदेश नम्बर ३ को प्रदेश सभाको संरचना (हरेक थोप्ला एउटा सिट हो)

प्रदेश ४ मा विवेकशीलले १.५ प्रतिशतको थ्रेसहोल्ड कटाए पनि सिट संख्या कम भएको कारण समानुपातिक सिट जित्न सकेन। प्रदेश ४ मा यो दलले १.७ प्रतिशत मत ल्याएको थियो।