मुख छाड्नेदेखि काँचो गिदी खानेसम्मको खेल जितेर समन बने पहिलो हिमालय रोडिज

फोटोमा देखिएको थाल र कचौरामा रहेका काँचो गिदी, जिउँदो गड्यौला, शंखेकिरा- सबलाई काँचै चपाएर निल्नुपर्ने। भेज मान्छे होस् कि ननभेज। अर्को च्वाइस छैन। खानैपर्ने।

तपाईँलाई लाग्ला- यस्तो पनि हुन्छ?

भएको थियो। हिमालय रोडिजको  नवौँ एपिसोडमा यो टास्क राखिएको थियो। एकै किसिमका टेलिभिजन कार्यक्रमहरु बजाउने क्रमलाई तोडेर अहिले नेपाली टेलिभिजनमा फ्रेन्चाइज शोहरु आउन थालेका छन्। एपी वानले नेपाल आइडल ल्याएको थियो भने हिमालय टिभीले भायकम १८ बाट लाइसेन्स लिएर रोडिज सुरु गरेको थियो। भारतमा यो एमटिभी रोडिजका नाममा देखाइन्छ। हिमालय रोडिजको पहिलो सिजन पनि समन श्रेष्ठले उपाधि जितेसँगै सोमबारबाट सकिएको छ। समन त्यही प्रतियोगी थिए जसलाई अडिसनमा जजहरुले मुख छाड्न लगाएका थिए। टिभीमा देखाउँदा सेन्सर गर्नुपर्ने गरी।

अडिसनमा समनले गरेको गाली भएको एपिसोड हेर्न क्लिक गर्नुस्।

सबभन्दा घिनलाग्दो टास्क काँचो गिदीदेखि शंखेकिरा खानुपर्ने एपिसोडमा समनले केही पनि बाँकी नराखी सबै खाएका थिए। हेर्नुस् त्यो एपिसोड

उपाधि जित्नको लागि ग्रान्ड फिनालेमा अनिमेष शाही र समन श्रेष्ठ दुई प्रतिस्पर्धी थिए। पहिलो टास्कमा प्रतिस्पर्धाबाट बाहिरिसकेका रोडिजलाई बोलाएर फिनालेका प्रतिस्पर्धीहरुलाई छान्न लगाई समूह बनाइएको थियो। दुई समूहबीच डोरी तान्ने प्रतिस्पर्धा अनिमेषको समूहले जितेको थियो।

पहिलो प्रतिस्पर्धा जितेपछि जितको फाइदास्वरुप अनिमेषलाई फिनालेको अन्तिम टास्कमा आफू पहिले जाने कि प्रतिस्पर्धीलाई पठाउने छनौट गर्ने सुविधा दिइएको थियो। साथीहरुले दोस्रोमा जाऊ भन्दाभन्दै पनि अनिमेषले पहिले जाने निर्णय गरे। तर यो निर्णय आफैलाई घातक त्यतिबेला सिद्ध भयो जब समनले भन्दा तीन गुणा बढी समय लगाएर उनको टास्क सकियो।

अन्तिम टास्कमा भने अनिमेषले १३ मिनेट १० सेकेन्ड लगाए जबकि समनलाई सोही टास्क सकाउन ४ मिनेट १९ सेकेन्डमात्रै लाग्यो। अनिमेषको धेरै समय उफ्रेर हथौडाले घण्टा बजाउन नसक्दा लियो। डाइरेक्टर आफैले उफ्रेर देखाएपछि बल्ल उनले त्यो काम गर्न सके। जबकि समनले एकै पटकमा घण्टा बजाइदिए। समन पेशाले फिजिकल फिटनेस ट्रेनर, क्लाइम्बिङ कोच र रक क्लाइम्बिङ गाइड हुन्।

फिनालेका लागि एमटिभी रोडिजको पहिलो सिजन सन् २००३ का विजेता रणविजयलाई अतिथिका रुपमा निम्त्याइएको थियो।

समनले ८ लाख ८० हजार रुपैयाँ नगद पुरस्कारसहित सिल्क एयरको कुनै गन्तव्यमा राउन्ड ट्रिप, आइफोन ६ प्लस र बजाज एभेन्जर बाइक पाए।

ग्रान्ड फिनाले एपिसोड हेर्नुस्-

गीत गाउने नेपाल आइडल र एडभेन्चर गेमको रियालिटी शो हिमालय रोडिजपछि अब नेपाली टेलिभिजनमा कस्तो शो हेर्न पाइने हो त?