बसीबसी खासै केही काम नगरी महिनाको एक लाख तलब पाउने हो? प्रदेश प्रमुख बन्नुस्

तपाईँलाई नेपालमै रहेर बसीबसी, खासै केही काम गर्नु नपर्ने तर ग्वाम्मै तलब पाउने जागिर पाउन मन छ? त्यसो हो भने प्रदेश प्रमुख बन्नुस्। प्रदेश प्रमुखको पारिश्रमिक र सुविधा सम्बन्धमा व्यवस्था गर्न बनेको विधेयक सरकारले सोमबार संसदमा दर्ता गरेको छ। संसदको म्याद सकिन लागेको हुँदा यो छिटोछिटो पास गर्नुपर्नेछ। विधेयकमा गरिएको व्यवस्था अनुसार प्रदेश प्रमुखले महिनामा रु एक लाख ४ हजार रुपैयाँ पाउनेछ। यति धेरै तलब भनेर आलोचना हुन्छ भनेर होला पारिश्रमिकका रुपमा ६४ हजार रुपैयाँमात्र छुट्याइएको छ। बाँकी ४० हजार चाहिँ अतिथि सत्कार र भैपरी खर्च भनेर दिइनेछ। यसको बिल पेश गरिरहनु नपर्ने भएकोले र मासिक आउने भएकोले यसलाई पनि पारिश्रमिक मै जोडे फरक पर्दैन। अरु पनि छन् सुविधा, सुन्ने हो?

• वर्षमा १८ हजार रुपैयाँ पोशाक सुविधा
• स्वदेशमा घुमे प्रति दिन ३ हजार रुपैयाँ भत्ता
• विदेशमा घुमे प्रति दिन २५० अमेरिकी डलर भत्ता
• युरोपियन मुलुकहरु, अस्ट्रेलिया, न्युजिल्यान्ड, अमेरिका, क्यानडा, कुवेत, कोरिया, जापान, हङकङ, रुस, कतार, जाम्बिया, युएई, सिंगापुर, लेबनान, बहराइनको भ्रमण गर्दा ३३ प्रतिशत थप रकम
• स्वदेशमा उपचार गराउँदा वा मेडिकल बोर्डको सिफारिशमा विदेशमा उपचार गराउँदा उपचार खर्च नेपाल सरकारले व्यहोर्ने
• त्यतिमात्र हैन कुरुवा बस्नुपर्ने भएमा कुरुवा खर्च वापत् एकजनाको मनासिब खर्च पनि नेपाल सरकारले उपलब्ध गराउने
• प्रदेश प्रमुखले आफ्नो पदीय हैसियतले सम्पादन गरेका कामकारबाहीको विषयमा निज पदमा रहँदा वा सेवानिवृत्त भएपछि निज उपर कुनै अदालतमा मुद्दा नचलाउने
• प्रदेशको राजधानीमा सरकारी घर आवासको रुपमा सुविधा
• आवासको सुविधा नभएसम्म घरभाडावापतको रकम
• सरकारी आवासको मर्मत तथा सम्भार खर्च
• घरको लागि उपयुक्त फर्निचरको व्यवस्था
• सवारी साधनको व्यवस्था
• गाडीको लागि इन्धन, मोबिल र मर्मत सम्भारको व्षवस्था
• टेलिफोन, कम्प्युटर, इन्टरनेट, फ्याक्स, पत्रपत्रिका जस्ता सञ्चार सुविधा
• एक जना निजी चिकित्सकको व्यवस्था
• चाडपर्व खर्चको रुपमा प्रत्येक वर्ष एक महिनाको पारिश्रमिक बराबरको रकम।
• १२ जना कर्मचारी रहेको निजी सचिवालय

सुविधाहरु देखेर तपाईँलाई लोभ लाग्यो होला। प्रदेश प्रमुखको काम चाहिँ के हुन्छ त?

काम खासै केही हुन्न हेर्नुस्। केन्द्रमा राष्ट्रपतिको जस्तो काम हो, त्यस्तै हो प्रदेश प्रमुखको काम। सेरेमोनियल हेड। प्रदेशमा केन्द्रको प्रतिनिधि हुने। प्रदेश सभामा बहुमत भएकोलाई मुख्यमन्त्री बनाउने, प्रदेश सभा विघटन गर्ने, निर्वाचन मिति तोक्ने, मुख्य मन्त्री र प्रदेश मन्त्रीहरुलाई शपथ खुवाउने, प्रदेशको संसदमा सम्बोधन गर्ने, प्रदेशको मन्त्रिपरिषद् नहुँदा कार्यकारिणी अधिकार प्रयोग गर्ने आदि इत्यादी।

के योग्यता हुनुपर्दो रहेछ त प्रदेश प्रमुख अर्थात् प्रदेशको छोटे राष्ट्रपति हुन?

-संघीय संसदको सदस्य हुन योग्य भएको,
-३५ वर्ष उमेर पूरा भएको र
-कुनै कानुनले अयोग्य नभएको

प्रदेश प्रमुख हुन गर्न चाहिँ के पर्छ त? केही गर्नु पर्दैन। राष्ट्रपतिले नियुक्त गर्ने हुँदा राष्ट्रपति नजिकको मान्छे हुनुपर्‍यो, राष्ट्रपतिलाई रिझाउन, विश्वास दिलाउन सक्ने हुनुपर्‍यो। राष्ट्रपति जुन दलको हो, उसको विश्वासिलो हुनुपर्‍यो। त्यति योग्यता पुग्यो भने तपाईँ पाँच वर्ष बसी बसी लाख कमाउने हुनुहुनेछ। ल, मौका नगुमाउनुस् है, अहिलेदेखि प्रयास गर्न थालिहाल्नुस्।