नाडामा गाडी, गाडीभित्र नक्कली नोटको गड्डी

सुरुवाललाई कम्मरमा बाँध्न इजार हुन्छ। सलवारमा भने नाडा हुन्छ। तर काठमाडौँमा नाडा भन्नाले अर्कै बुझिन्छ- नेपाल अटो मोबाइल डिलर्स एसोसिएसनलाई छोटकरीमा भनिने शब्द हो नाडा। हरेक वर्ष दशैँअगाडि यो संस्थाले गाडी प्रदर्शनी गर्ने गर्छ जसलाई नाडा अटो शो भनिन्छ। शो आइतबार सकियो। गाडीको मोडलमात्र हैन, गाडीसँगै उभिने मान्छे मोडल हेर्नका लागि पनि यो प्रदर्शनी प्रख्यात छ। गाडी लञ्च हुँदा वा प्रदर्शनीमा महिला मोडल राख्ने नेपालको मात्र हैन बाहिरका देशहरुको पनि चलन हो। यसमा नौलो मान्नुपर्ने केही छैन। अचम्म त एउटा गाडीमा नोटको गड्डी राखेको देख्दा पो लाग्यो।

अलि नजिक गएर हेर्दा पो थाहा भयो, नोट त नक्कली पो रहेछ। हजारका नोटमा डम्मी लेखिएको रहेछ। प्रदर्शनीमा दर्शकको ध्यान तान्न यो फन्दा गरिएको रहेछ।

त्यसो त नाडामा अनेक थरि ध्यान तान्ने काम हुन्छन्। ६ वर्षअघि मोटरसाइकल र मान्छे मोडलसँग फोटो खिच्न ५० रुपैयाँ तिर्नुपर्ने बनाइएको थियो। तैपनि मान्छेको भीड हुन्थ्यो स्टलमा। यस पटक भने त्यसरी पैसा तिरेर फोटो खिच्न पर्दैन थियो, सित्तैमा खिच्न पाइन्थ्यो।

केही अघिको शोमा विदेशी मोडलहरु समेत मगाइएको थियो। तर यस पटक भने सबै नेपाली मोडलमात्रै थिए। हेरौँ केही फोटो

भिडियो हेर्नुस्। तल भिडियो नखुले यहाँ क्लिक गर्नुस्।