देउवा र सुशीला कार्कीबीच के भएको थियो गोप्य सहमति?

‘साझा सवाल’मा प्रधानमन्त्री शेरबहादुर देउवाको जवाफ दिने शैलीको व्यापक आलोचनाका बीच उनले त्यही शैलीमा जवाफ दिँदा फुत्काएका केही गम्भीर विषय भने छायाँमा पर्न गयो। तत्कालीन प्रधान न्यायाधीश सुशीला कार्कीमाथि महाभियोगको प्रस्ताव फिर्ता गर्दा पर्दापछाडि सहमति भएको र त्यो सहमतिपछि धेरै कुरा भएको प्रधानमन्त्री देउवाले बताएका छन्।

के थियो त्यस्तो सहमति?

न देउवाले बताएका छन्, न निवृत्त भएपछि कडा अन्तर्वार्ता दिँदै हिँडेका निष्ठावान सुशीला कार्कीले नै बताएकी छिन्। आखिर देश र जनतालाई अँध्यारोमा राखी किन गर्नुपरेको थियो त्यस्तो सहमति? कहिले सार्वजनिक हुने हो त्यो सहमतिको विवरण?

सुशीला कार्कीलाई किन महाभियोग लगाइयो?
-महाभियोग फिर्ता लिइसकेको हुनाले केही बताउन चाहन्नँ।

फिर्ता लिनुको कारण चाहिँ के हो त नि?
-केही कुरा भयो होला नि त फिर्ता लिनलाई। त्यो भन्न चाहन्नँ अहिले म। त्यही हो।

फिर्ता लिनुपर्ने महाभियोग दर्ता चाहिँ किन गरेको?
-केही कुरा गरियो, फिर्ता गरियो। त के भयो त त्यो?

त्यसो भए त्यो आरोप झुटा हो?
-आरोप…त्यो भित्री केही कुरा हुन्छन् नि।

केटाकेटी खेले जस्तै काम गरेको हो?
उहाँलाई लाग्यो होला। केटाकेटी खेलेको जस्तो छ? केटाकेटी खेलेकै हैन।

अनि के गर्‍या त?
-धेरै कुरा भएको छ त्यसले। किन भएको छैन?

के भयो?
केही सहमति भएर फिर्ता लिएको हो।

के भाको थियो?
त्यो म भन्न चाहन्नँ अहिले यहाँ।

अलिकति भन्दिनुस् न त।
उहुम्…

थोरैमात्रै
जबर्जस्ती गर्न पाइन्छ?

जबर्जस्ती हैन अनुरोधमात्र।
भइहाल्यो म भन्दिनँ।

प्रधानमन्त्रीले ‘भित्री केही कुरा हुन्छन् नि’ भनेका छन्। ‘केही सहमति भएर फिर्ता लिएको हो’ सँगै ‘धेरै कुरा भएको छ त्यसले’ पनि भनेका छन्। के हो त त्यो सहमति? के जानकारी दिनुनपर्ने ?

अनि निष्ठाकी प्रतिमूर्ति सुशीला कार्कीलाई एक दुई हप्ता बाँकी रहेको पदावधिका लागि किन त्यस्तो सहमति गर्नुपरेको होला? किन भएको भनिएको त्यो सहमतिपछिका अन्तर्वार्ताहरुमा कार्कीले देउवाको कुने विरोध नगरेको होला? किन महाभियोग फिर्ता लिने कुरा भएपछि त्यसअघिसम्म फास्ट ट्रयाकमा कुदिरहेको आइजी केस अहिलेसम्म पेन्डुलम भइरहेको होला? किन देउवाविरुद्धको अदालतको मानहानी मुद्दाको कारबाही अघि नबढेको होला?

यी प्रश्नहरुको जवाफ देउवाबाट आउँदैन। सोध्दा जवाफ पाइन्छ- जबर्जस्ती गर्न पाइन्छ?

सुशीला कार्कीबाट पनि किन सहमतिबारे केही जवाफ नआएको होला?