राजीनामा दिएको चार दिनपछि पार्टी सभापति शेरबहादुर देउवासँग ‘मन माझामाझ’ गरेर आजदेखि उपप्रधानमन्त्री तथा गृहमन्त्री विमलेन्द्र निधि पुरानै पदमा फर्किएछन्। कस्तो चमत्कारी वस्तु रहेछ त्यो मन ‘माझ्ने’? यस्तो वस्तु अरुलाई पनि बाँड्नु पर्ने। शेरबहादुर र सुशीला कार्कीको पनि त्यसरी नै मन माझेको भए न्यायपालिका र कार्यपालिकाको यत्रो द्वन्द्व हुने थिएन। केपी ओली र राजपाका नेताहरु बसेर यसरी नै मन माझ्न पाए देशको एकता मजबुत हुन्थ्यो। देशभित्र मात्र हैन, यस्तो मन माझ्ने वस्तु त विदेशमा एक्सपोर्ट पनि गर्न हुन्थ्यो। भारत र पाकिस्तानका नेताको मन माझ्न पाए त क्षेत्रीय शान्ति छाउँथ्यो। अरुणा लामाले पनि यसपालि त मनै फाट्यो, केले सिउने केले टाल्ने हो भनेर गीत नगाई मन माझ्नतिर लाग्थे।
मन माझेर फर्किए पनि प्रधानमन्त्री तथा मन्त्रिपरिषद् कार्यालयको आधिकारिक वेबसाइटमा भने अझै विमलेन्द्र निधिको ठाउँ कमल थापाभन्दा मुनि नै छ।
त्यसो त कमल थापाले पनि राजीनामा दिइसकेका हुन्। तर उनको पनि राजीनामा स्वीकृत भएको छैन। के थाहा, उनीसँग पनि मन माझिने हो कि?
यसअघि भारतबाट फर्कँदा निधिले आफूलाई कमल थापाभन्दा वरियतामा मुनि राखेको थाहा पाएपछि विरोध गरेका थिए। जसका कारण मन्त्रिपरिषद् बैठकै बस्न सकेको थिएन। त्यतिबेला त्यो वेबसाइटमा निधिकै ठाउँ माथि थियो। वीपीले पनि जमानामा वरियतासम्बन्धी यस्तै विवाद गरेका थिए भन्ने तर्क पनि उनकोबाट आएको थियो। पछि दोस्रो वरियता स्वीकार गरेर उनी मन्त्रिपरिषद बैठकमा फर्किएका थिए। तर त्यसलगत्तै महाभियोग प्रकरण आयो र उनले राजीनामा दिए। अब भने राजीनामा फिर्ता लिएर उनी फेरि आफ्नै पदमा फर्किएका हुन्।
