हिसिला यमीको नारा विवाद : रफू भर्नेको बचाउका दुई कूतर्क अनि उनको आफ्नै स्पष्टिकरण यस्तो

पूर्व मन्त्रीसमेत रहेकी हिसिला यमी ‘यो देशलाई खारेज गर’ भन्दै नारा लगाइरहेको अवस्थाको भिडियो सोसल मिडियामा भाइरल भएपछि विवादमा आइन्। त्यसपछि उनको बचाउमा रफू भर्नेहरुबाट दुई कूतर्क गरियो –

-उनले देश हैन अध्यादेश भनेकी हुन्। अध्यादेश खारेज गर भन्न खोजेकोमा देश हुन पुगेको हो।
-उनले देश हैन आफूहरुमाथि दमन गर्ने डेस्पी (डिएसपी) लाई खारेज गर भनेकी हुन्।

तर बचाउका यी दुई तर्क आज उनी आफैले यसबारे स्पष्ट पार्न आयोजित पत्रकार सम्मेलनपछि कूतर्क साबित हुन पुगेको छ। उनले स्वीकारेकी छिन् उनले देश खारेज गर नै भनेकी हुन्। तर किन र कुन अवस्थामा? उनको स्पष्टीकरण यस्तो छ।

हेर्नुस् उनले के भनिन् भिडियोमा
https://youtu.be/1tHcIJGv3hw

झण्डै एक घण्टाजतिको सकस र ठेलमठेलमा म अर्धमुर्छित जस्तै हुन पुगेछु। त्यो बेला मेरा पति डा. बाबुराम भट्टराई लगायत अन्य साथीहरुले मलाई सम्हालेर राख्नुभएको थियो। त्यसैबीच सुरक्षाकर्मीहरुले हामीलाई समातेर सुरक्षा भ्यानमा राखे। म त्यो बेला आवेस र अर्धचेतकै अवस्थामा थिएँ। तीब्र आवेसमा म चिच्याउँदै नाराबाजी गर्न लागेछु। त्यसैक्रममा मैले स्थानीय निर्वाचन ऐनको ‘यो आदेश खारेज हुनुपर्छ’ भन्न खोज्दा बेहोशीपूर्वक अन्यथा हुनपुगेछ।

उनले मैले आदेशलाई अन्यथा उच्चारण गर्न पुगेको भन्दै यस्तो हुनुमा तीन वटा कारण पनि दिएकी छिन्-
-आन्दोलनको प्रेसर,
-भाषागत कमजोरी
-बेहोसी

भाषागत कमजोरीका विषयमा उनले म जनजाति समुदायकी छोरी भएकोले मेरो नेपाली भाषामा राम्रो दखल छैन भनी स्पष्टीकरण दिएकी छिन्।

खासमा अध्यादेश भन्ने तर्क मिल्दैन थियो। किनभने संसद नबस्दा पो हो अध्यादेश ल्याउने। संविधान सभामा सहभागी भएकाहरुले बाहेक अरुले रोजेकै चुनाव चिह्न नपाउने यो व्यवस्था अध्यादेशले हैन ऐनले बनाएको हो। स्थानीय तह निर्वाचन ऐन, २०७३ जसको विरोधमा बाबुरामको पार्टी नयाँ शक्तिले यो विरोध कार्यक्रम गरेको थियो। हिसिया नयाँ शक्तिकी विदेश विभाग संयोजक हुन्।

त्यसो त उनले भनेको आदेश शब्द पनि मिल्दैन। किनभने ऐनलाई आदेश भन्न कसरी मिल्छ र। तर उनको विज्ञप्तिको ड्राफ्ट गर्नेले चलाखीपूर्व स्थानीय निर्वाचन ऐनको ‘यो आदेश खारेज हुनुपर्छ’ भन्न खोजेको भनेर भाषा मिलाएका छन्। तर ‘आ’ नै नभनी ‘देश’ मात्र भनिसकेपछि त सक्किगो नि।

तर उनले माफीसमेत माग्दै यसो भनिसकेकी छिन्-

त्यो परिस्थितिजन्य घटना र बेहोसीमा आफ्नो प्यारो देशका विरुद्ध मबाट जे जस्ता शब्दहरु निस्किए सोप्रति म अत्यन्त दु:खित छु । म अन्तरहृदयैदेखि यसवापत सम्पूर्ण नेपाली दिदीबहिनी तथा दाजुभाइहरुसँग क्षमायाचना गर्दछु । मलाई भाषागत कमजोरी देखाई सचेत गर्ने सबै दाजुभाइ दिदीबहिनीहरुलाई धन्यवाद दिन चाहन्छु । आगामी दिनमा आफ्ना अभिव्यक्तिहरुमा पूर्ण सचेत रहने प्रतिवद्धता व्यक्त गर्दछु ।

कमजोरी भएको हो भनी स्वीकारेर क्षमा नै मागिसकेपछि अब यसलाई ठूलो इस्यु बनाउनु बेकार छ। हाम्रो देश हिसिलाले खारेज गर भनेकै हो भने पनि खारेज हुने चिज हैन। सिके राउतलाई त देशद्रोहको मुद्दा चलाउन सकेको छैन हिसिलालाई त्यति भनेकै आधारमा देशद्रोहको मुद्दा चल्छ भनेर नै नहसाउँ होला। मान्छे मार्नेलाई त कारबाही नभएको देशमा नाराका कारण जेल? एकताका ‘बाबुरामलाई काम गर्न देऊ’ नारासमेत लाग्ने सोसल मिडिया अहिले किन उनको विरोधी भइरहेका छन्, किन उनले आज कस्तो घमाइलो दिन भनेर लेख्दा पनि १७ हजार मारेर घमाइलो भएँ भन्छस् भन्ने खालका प्रतिक्रिया आउन सक्छन्? उनले पाएको सजाय यही हो, उनले आफैले विश्लेषण गर्नुपर्ने कुरा पनि यही हो।

यस्तो छ हिसिला यमीको विज्ञप्ति

यस्तो थियो उनले लगाएको नारा भिडियो हेर्नुस्