‘भैँसीकारिता’ को नमूना पनि हेर्ने कि

अस्ति भर्खर तपाईँहरुले रुद्री पत्रकारिता र अविश्वासी पत्रकारिताको नमूना हेर्नुभयो। त्यो थियो नेपाली पत्रकारिताका दुई नमूना समाचार। अब आज भने नेपालभन्दा अलि पर पाकिस्तानको टिभीमा प्रसारित एउटा नमूना समाचार हेरौँ। त्यसो त नेपाली टिभी कै समाचारहरु पनि नमूनाका नहुने हैनन्। आजलाई चाहिँ जिओ टिभीको समाचार हेरौँ र सिकौँ ‘भैँसीकारिता’ कसरी गर्ने?

पाकिस्तानको निजी न्युज च्यानल जिओ टिभीमा एक जना पत्रकार छन् अमिन हफिज। अघिल्लो शनिबार उनले एउटा भिडियो रिपोर्ट बनाए- लाहौरका सडकहरुमा बनेका आकाशे पुलमा गाईभैँसीहरु भर्‍याङ चढेर बाटो पार गर्छन्। तर मानिसहरु भने सडकबाटै बाटो काट्छन्।

समाचार अलि अनौठो विषयको छ। तर त्यसभन्दा रमाइलो त्यतिबेला हुन्छ जब पत्रकार अमिन हफिजले बुम एउटी भैँसीतर्फ तेर्स्याउँदै सोध्छ- आप अभी पुल उतरकर आई हो। ये काम आसान लग रहा है या मुश्किल? (तपाईँ भर्खरै पुल चढेर आउनुभयो, यो काम सजिलो लागिरहेको छ कि गाह्रो?)

भैँसीले बोल्ने कुरा आएन। म्हा….गर्छ। अनि त्यसलाई कत्ति न बुझेको जस्तो गरेर उनले अर्थ्याउँछन्- यसले शायद यो भन्ने कोशिश गरिरहेको छ कि कुनै पनि जनावरका लागि भर्‍याङ चढ्नु र ओर्लनु सजिलो हैन गाह्रो काम हो।

अझ क्लोजिङ पिटिसी झन् रमाइलो छ, आकाशे पुलबाट गाईभैँसीहरु झरिरहेका हुन्छन्, बाटो छेकिने गरी रिपोर्टर पनि झर्दै पिटिसी दिइरहेका हुन्छन्।

शब्दभन्दा पनि भिडियो हेर्दा मज्जा हुन्छ, हेरौँ भिडियो-

भिडियो माथि नखुले यहाँ क्लिक गरी हेर्नुस्

[तपाईँले पनि यस्तै कुनै नेपाली नमूना टेलिभिजन समाचार याद गर्नुभएको छ? तल कमेन्टमा बाँड्नुस् है]