पत्ता लाग्यो : कहाँ जाँदो रहेछ त ओर्जिनल स‍ंविधानका पाँच प्रति?

स‍ंविधान भनेको चानचुने किताब होइन। यो अरु किताब जस्तो अरुले छाप्न पाउँदैनन्। जति छापिन्छ, सरकारले छाप्छ। देशको स‍ंविधान त सबै जनताको हो नि, हामीले छाप्न नपाउने? भन्ने लाग्ला कसैलाई। तर होस गर्नुस् है। कानून तथा न्याय मन्त्रालयको स्वीकृति नलिई नेपाल कानूनको मुल वा अनुवादित पाठ प्रकाशन गर्न मिति २०३३।११।१७ को नेपाल राजपत्रको सूचना बमोजिम रोक लगाइएको छ। कानुन किताब व्यवस्था समितिबाहेक कसैले यो विपरीत प्रकाशन गरेमा प्रतिलिपि अधिकार ऐन, २०५९ बमोजिम कारवाही हुन्छ। समितिले छाप्ने संविधान सबै नक्कल हो। ओर्जिनल त आज असोज १ गते सभासद्हरुले साइन गरेको र संविधान सभा अध्यक्षले प्रमाणिकरण गरेको नेपाली कागजमा छापिएको पाँच प्रति हो।

यो पाँच प्रति कहाँ कहाँ जाँदो रहेछ त ?

मिडियामा आएका समाचारमा भने चार ठाउँमा पठाउने कुरा मात्रै छ। सरकारी समाचार एजेन्सी राससले पनि चार ठाउँमा पठाउनेलाई मात्रै समाचार बनाएको पाइयो-

घोषणा भएको संविधानको एकप्रति संविधानसभा सचिवालयको अभिलेखमा राखिने छ भने अरु एकप्रति राष्ट्रपतिको कार्यालय, प्रधानमन्त्री तथा मन्त्रिपरिषद्को कार्यालय र कानून, न्याय, संविधानसभा तथा संसदीय मामिला मन्त्रालयमा पठाइनेछ ।

यसैलाई आधार मानेर हिजो एउटा ब्लग लेखेर बाँकी एक प्रति चाहिँ कहाँ जान्छ होला अनुमान लगाउन भनिएकोमा पाठकहरुले गजब गजबका अनुमान लगाए। कसैले सर्वोच्च अदालतमा जान्छ भने कसैले युएनमा जान्छ भनेर ठोकुवा नै गरे। कसैले मुद्रण विभाग भने त कसैले राष्ट्रिय अभिलेखालय।

रमाइला अनुमान लगाउनेको पनि कमि थिएन। मदन राजले लेखे, कता जान्छ ?? पशुपतिमा राखेर पूजा गर्ने होला कि ? त्यस्तै डोरप्रसादले लेखे, मोदीका दूतले दिल्ली लग्ने भनेर लिएर जान्छन्, तर बाटैमा उपेन्द्र यादवले “अरे भैया ये तो हमरा काम लगेगा, जलाने के लिए” भनेर माग्न बेर छैन।

खासमा यो पाँच प्रति जान्छ कहाँ त ? स‍ंविधानसभाको रिपोर्टिङ गर्ने साथी मनोज सत्यालले बुझ्दा थाहा भयो, बाँकी सबै ठीक रहेछ जाने ठाउँ, सं‍सदले दुई प्रति राख्ने रहेछ। एउटा सचिवालयमा, एउटा सचिवालयको कानुन महाशाखाको विधेयक शाखाको अभिलेखालयमा।

यो अनुसार खासमा पाँच कपि जाने ठाउँ यो रहेछ-
१) राष्ट्रपति कार्यालय
२) प्रधानमन्त्री तथा मन्त्रिपरिषद्को कार्यालय
३) कानुन, न्याय, स‍ंविधानसभा तथा संसदीय मामिला मन्त्रालय
४) संसद सचिवालय
५) संसद सचिवालयको कानुन महाशाखा अन्तर्गत रहने विधेयक शाखाको अभिलेखालय

यो भयो संसद सचिवालयबाट प्राप्त जानकारी। कानुन मन्त्रीले पनि यसबारे ट्विट गरेका छन्। उनका अनुसार एउटा राष्ट्रिय अभिलेखालयमा राखिनेछ-

सभासद्का रुपमा #संविधानको मूल ५ प्रतिमा हस्ताक्षर गरें। हस्ताक्षर भएका ५ प्रति निम्न ठाउँमा सुरक्षित राखिन्छन् – pic.twitter.com/6LrnMwpmPc

— Narahari Acharya (@NarahariA) September 18, 2015

यो पनि हेर्नुस्-
यस्तो छ असोज ३ गतेदेखि लागू हुन लागेको संविधान, हेर्नुस् संशोधन प्रस्ताव पारित भएको धारासहितको संविधान