हामी यम भन्छौँ, अङ्ग्रेजीमा प्लुटो भनिन्छ। पृथ्वीबाट धेरै टाढा रहेको यो ग्रह पत्ता लागेकै बल्ल ८५ वर्ष भयो। अमेरिकी अन्तरिक्ष एजेन्सी नासाले पठाएको उपग्रहले प्लुटोका दृश्य खिच्न सफल भएको छ। अझ हाम्रो लागि के रोचक रह्यो भने त्यहाँ देखिएका अग्ला अग्ला पर्वतको नाम प्रथम सगरमाथा आरोही नेपाली तेन्जिङ नोर्गेको सम्मानमा नोर्गे मोन्टेस राखिएको छ। नासाका जेफ मूरेले पिबिएसलाई बताए अनुसार ‘सौर्य मन्डलका कुनै पनि ठाउँको नाम नेपालीको नाममा रहेको यो पहिलो हो।’ जमानामा हाम्रा जनकविकेशरी धर्मराज थापाले गाएका थिए- हाम्रो तेन्जिङ शेर्पाले चढ्यो हिमाल चुचुरा, गम्केर बजा खैँजडी, झम्केर नाच मुजुरा। थापा जिउँदै भएको भए अर्को एउटा गीत पनि थप्थे कि। आउनुस् हेरौँ कस्तो देखिँदो रहेछ त यम ग्रहको नोर्गे पर्वत।
