यहाँहरुमध्ये धेरैले ध्रुव राठीको भिडियो युट्युबमा हेर्नुहुन्छ होला। २९ मिलियनभन्दा बढी सब्सक्राइबर्स भएका उनले हिजो नेपालको बारेमा एउटा भिडियो राखे- जसमा सुरु मै भनिएको छ कि पूर्व प्रधानमन्त्रीको घरमा आगो लगाउँदा उनकी पत्नीको निधन भयो।
प्रमाणका रुपमा उनले भारतीय मिडिया मिन्टको अनलाइनमा प्रकाशित समाचार राखेका थिए। ध्रुव राठीमात्रै होइन, अन्य थुप्रै भारतीय मिडियाले पनि यो खबर छापेका छन्।
तर, यो सही थिएन। यो मिथ्या सूचना थियो। नेपालफ्याक्टचेकमा यसबारे फ्याक्टचेक प्रकाशन भइसकेको छ। हेर्नुस् यहाँ क्लिक गरी। तर प्रश्न उठ्छ- यो मिथ्या खबर फैलायो कसले ?
भारतीय मिडियामा भन्दा पहिला यो खबर नेपाली अनलाइनहरुमा आएको थियो।
दुई दिनअघि अर्थात् मंगलबार भदौ २४ गते अनलाइन समाचारहरु हेर्नुभएको भए तपाईँले याद गर्नुभएको होला- थुप्रै नेपाली अनलाइन मिडियाले यो समाचार राखेका थिए।
मैले हाम्रोपात्रोको फिडबाट केही अनलाइनहरुको शीर्षकको स्क्रिनसट यहाँ हालेको छु-
यी मध्ये केही अनलाइनहरुमा अझै पनि यो समाचार छ। उदाहरणका लागि सूत्रन्युज (यहाँ हेर्नुस् अहिलेको, अर्काइभ गरिएको)
नेपाल समय (यहाँ हेर्नुस् अहिलेको, अर्काइभ गरिएको)
यिनैमध्ये केही अनलाइनका समाचार हेर्दा यो मिथ्या समाचार फैलिनुको मूल स्रोतबारे पत्ता लाग्छ।
उदाहरणका लागि यो हेर्नुस्-
यो समाचारमा समाचारको स्रोत रासस लेखिएको छ। अर्थात् यो झुटो समाचार फैलाउने अरु कोही नभएर सरकारी समाचार एजेन्सी राष्ट्रिय समाचार समिति पो रहेछ।
राससले पार्टी नेतृ दिलु पन्तलाई उद्धृत गरेको छ। जबकि मृत्युसम्बन्धी समाचार अस्पतालबाट मात्र पुष्टि गरेर राख्नु पर्ने हो।
सरकारी समाचार एजेन्सीले नै समाचार पठाएपछि विश्वास गरेर अरु अनलाइनहरुले पनि समाचार हाले होलान्। पछि समाचार गलत साबित भएपछि राससलाई दोष लगाएर माफी माग्दै सच्याए पनि। जस्तै लोकान्तरको यो हेर्नुस् अवस्था-
त्यसैगरी थाहाखबरले पनि सच्यायो।
वास्तवमा झलनाथ पत्नीलाई गम्भीर अवस्थामा अस्पतालमा लगिएको थियो। उनी घाइते थिइन्।
आज बिहीबार दिउँसो उनलाई उपचारका लागि राखिएको कीर्तिपुर अस्पतालका निर्देशक डा. किरण नकर्मीले भनेका छन्, ‘उहाँको स्वास्थ्य अवस्था क्रिटिकल छ,उपचार भइरहेको छ।’