उहिले सन्ध्याकालीन पत्रिकाहरुको जमानामा हकरले दुर्घटनामाकृष्णप्रसाद भट्टराई ठहरै भनेर चिच्याइ चिच्याइ समाचार बेच्थे रे। के रैछ भनेर मान्छेलाई चासो लाग्थ्यो अनि हतार हतार किनेर पढ्थे। पढ्दा त नेता कृष्णप्रसाद भट्टराई नभएर उही नामको अर्कै सामान्य व्यक्ति हुन्थ्यो रे।
झण्डै झण्डै त्यस्तै काम अहिले एआईको जमानामा भइरहेको छ। चाइनिज एआई डिपसिकले तहल्का मच्चाउँदा चर्चामा आयो यसका संस्थापक लियाङ वेनफेङ। तर वेनफेङ को हुन् भन्ने चाहिँ विश्वका धेरै मिडियाले चिन्दै चिनेनन्। यसमा नेपाली मिडिया पनि पर्छन्। विश्वका अरु मिडियाले त आफूले गल्ती गरेको थाहा पाएर सच्याउन थालिसके। तर नेपाली मिडिया भने अझै झुक्किरहेको छ।
अनलाइनखबरले आज एउटा समाचार राखेको थियो- डिपसिक संस्थापकको गाउँमा दैनिक १० हजार पर्यटक, ढुंगामाटो ‘चिनो’ लानेको ओइरो
अलि अघि अर्थात् माघ १५ गते रातोपाटीले पनि ‘को हुन् डिपसिक बनाउने लियाङ वेनफेङ ?’ शीर्षकको समाचारमा यही फोटो राखेको थियो। स्क्रिनसट हेर्नुस्-
कान्तिपुरले पनि माघ १६ गतेको पत्रिकामा यही टाइसहितको कोट लगाएको चश्माधारी युवकको फोटो राख्दै उसैदाई डिपसिकका संस्थापक लियाङ वेनफेङ भनेर चिनाएका छन्।
नेपालका तीन वटा नाम चलेका मिडियाले भन्दैमा यही सही हो भन्ठान्नु होला फेरि।
यिनी पनि लियाङ वेनफेङ नै हुन्। तर डिपसिकका संस्थापकवाला वेनफेङ हैनन्। उनी त अर्कै कम्पनीका डाइरेक्टर हुन्। हेर्नुस् यसबारे चिनियाँ विकिपिडिया स्टाइलको वेबसाइटमा जानकारी
हुनुपर्ने यो मान्छे
खासमा हुनुपर्ने चाहिँ यो मान्छे हो। डिपसिकका संस्थापक लो प्रोफाइलमा बसिरहेका थिए। चिनियाँ सरकारी टेलिभिजनमा डिपसिकका संस्थापकले चिनियाँ प्रधानमन्त्रीलाई भेटेको भन्दै प्रसारण भएको दृश्यपछि अरु अन्तर्राष्ट्रिय मिडियाले पनि गल्ती महसूस गरेका थिए।
त्यसपछि न्युयोर्क टाइम्सलगायतका मिडियाले यही फोटो चलाउने गरेका छन्। यसबारे रोयटर्सले गएको जनवरी ३० मा नै फ्याक्ट चेक पनि गरिसकेको छ।
के नेपाली मिडियाले पनि आफूले अर्कै व्यक्तिको फोटो राखेकोमा गल्ती महसूस गरी सही फोटो हाल्लान् त ?