एमालेले नारायणी नदीको किनारमा आज १० औँ महाधिवेशनको उद्घाटन गर्यो। देशभरबाट ठूलो संख्यामा कार्यकर्ताहरु त्यहाँ पुगेको फोटो अहिले मिडियामा देख्न पाइन्छ। कार्यक्रममा एमालेले परमादेशका प्रधानमन्त्री भन्ने गरेका शेरबहादुर देउवा पनि उपस्थित थिए। लामो समयपछि पूर्व प्रधानमन्त्री ओली र वर्तमान प्रधानमन्त्री देउवा एउटै मञ्चमा उभिएका थिए। सर्वोच्च अदालतले परमादेश नदिएको हुँदो हो त प्रधानमन्त्री ओली अनि विपक्षी दलका नेता देउवा हुन्थे अहिले पनि शायद। हुनत अहिले सर्वोच्च अदालतमै जात्रा भइरहेको छ। तर सर्वोच्चको एउटा अर्को आदेश नहुँदो हो त यो दृश्य पनि फरक हुनसक्थ्यो। २०७७ फागुन २३ गते सर्वोच्च अदालतले उत्प्रेषणको आदेशले एमाले र माओवादीको पार्टी एकीकरण खारेज नगरिदिएको भए अहिलेको शक्ति सन्तुलनै बेग्लै हुनसक्थ्यो।
