शपथ नखाइकनै बाइडेनले कार्यकाल सुरु गरेको अन्नपूर्ण पोस्टको समाचार सुटुक्कै सच्चियो

अमेरिकी राष्ट्रपतिको शपथ हुन्छ जनवरी २० तारिखमा। तर जनवरी १७ तारिखमै अन्नपूर्ण पोस्टले ‘उच्च सुरक्षा व्यवस्थाबीच बाइडेनको कार्यकालको उद्घाटन भएको छ’ भनेर समाचार लेखेको थियो। त्यतिमात्र होइन, नवनिर्वाचित राष्ट्रपति जो बाइडेनले कार्यकालको पहिलो दिनमै निवर्तमान राष्ट्रपति डोनल्ड ट्रम्पका निर्णय उल्ट्याउन थालेको समेत लेखेको बारे ब्लग अस्ति लेखेको थिएँ। छुटाउनुभएको भए यहाँ क्लिक गरी पढ्नुस्। आज फेरि त्यही लिङ्कमा यसो क्लिक गरी हेरेको त समाचार सुटुक्कै सच्याइसकेको रहेछ। ‘पहिलो दिनमै बाइडेनले उल्ट्याए ट्रम्पका निर्णय’ शीर्षकलाई सच्याएर ‘पहिलो दिनमै बाइडेनले ट्रम्पका निर्णय उल्ट्याउने’ बनाइएछ।

पुरानो समाचारमा ‘अमेरिकामा नवनिर्वाचित राष्ट्रपति जो बाइडेनले कार्यकालको पहिलो दिनमै निवर्तमान राष्ट्रपति डोनल्ड ट्रम्पका निर्णय उल्ट्याउन थालेका छन्’ लेखिएको थियो। अहिले त्यसलाई ‘उल्ट्याउने भएका छन्’ बनाइएछ।

‘मुस्लिम मुलुकहरुबाट अमेरिका यात्रामा लगाएको प्रतिबन्ध फुकुवा गरिदिएका छन्’लाई ‘फुकुवा गर्ने घोषणा गरेका छन्’ बनाइएछ।

गरिसकेका भनेर लेखेका समाचार जतिलाई गरिनेछ, गर्ने तयारी छ, गर्ने घोषणा बनाइएछ।

१७ तारिखमै ‘यही जनवरी २० मा उच्च सुरक्षा व्यवस्थाबीच बाइडेनको कार्यकालको उद्घाटन भएको छ’ लेखेकोमा ‘यही जनवरी २० मा उच्च सुरक्षा व्यवस्थाबीच बाइडेनको शपथ तथा पद बहालीको कार्यक्रम छ’ बनाइएछ।

पढ्नुस् पहिलेको समाचार
पढ्नुस् अहिलेको समाचार

अनि यति ठूलो गल्ती गर्दा पनि समाचार सच्याइएको बारे सानो सूचनासम्म राखिएको छैन।

अन्तर्राष्ट्रिय चलन अनुसार यसो हुनुपर्नेमा यसो भएको भनेर लेख्नु त परै जावस्, राष्ट्रिय चलन अनुसार यसअघि अन्यथा भएकोमा सच्याइएको छ भन्ने नोटसमेत नराख्नुको कारण चाहिँ लाज लागेकैले होला कि !

मान्छे हो, गल्ती त हुन्छ। गल्ती नगर्ने को नै होला र।

तर राष्ट्रिय मिडियामा यसरी गल्ती गरिसकेपछि यदि सच्याएको सानो सूचनासम्म राखेको भए पाठकको विश्वासै आर्जन हुने थियो- यो मिडियाले चाहिँ सही समाचार दिन्छ, गलत समाचार दिए पनि त्यसलाई सच्याउँछ भन्ने त पर्थ्यो होला नि। अब त जे पायो त्यही समाचार पनि हाल्छ, सुटुक्क सच्याउँछ, सच्याउँदा पनि सच्याएको भन्दैन भन्ने पर्दैन पढ्नेहरुलाई ?

भनेर के गर्नु, नेपालको पत्रकारिता यसरी नै चलिरहेको छ। कि कसो ? 🙂