नेपालमा कोरोना संक्रमितको संख्यामा आज नयाँ रेकर्ड बनेको छ : विगत २४ घण्टामा अहिलेसम्मकै सबैभन्दा बढी २२६ नयाँ संक्रमण पुष्टि भएको छ। लगातार पाँच दिनसम्म १ सयभन्दा बढी संक्रमितको संख्या थपिँदै आएको नेपालमा आज पहिलो पटक २ सयभन्दा बढी थप भएको हो।
२८ मे अर्थात् जेठ १५ गतेदेखि कोरोनाको ग्राफ उकालो लाग्ने क्रम सुरु भएको हो। यो दिनदेखि हरेक दिन सयभन्दा बढी संक्रमित भेटिएका छन्।
हरेक दिन संक्रमितको संख्यामा नयाँ कीर्तिमान पनि कायम हुँदै गरेकोमा हिजो एक दिन अस्तिको भन्दा संख्या १८ ले घटेको थियो। तर आज भने हिजोभन्दा ५५ ले बढेको छ।
मृत्यु दर भने संक्रमित संख्याको तुलनामा अत्यन्तै न्युन छ। १७९८ संक्रमित हुँदा मृत्यु ८ जनाको मात्र भएको छ। अर्थात् ०.४४ मात्रै।
रिकभरी रेट भने १२.२९ छ। हालसम्म २२१ जना डिस्चार्ज भएका छन्।
आज नयाँ जिल्ला डोटीमा संक्रमण फेला परेको छ। संक्रमण देखिएका कूल जिल्लाको संख्या पनि ५९ पुगेको छ।