अन्ततः नेपालमा पनि कोरोनाबाट मृत्यु भएको स्वास्थ्य मन्त्रालयले पुष्टि गरेको छ। सिन्धुपाल्चोक घर भएकी २९ वर्षीया महिलाको कोरोनाबाट मृत्यु भएको पुष्टि भएको हो। कोरोना संक्रमितको संख्या २८१ पुग्दा नेपालमा पहिलो मृत्यु रेकर्ड भएको हो। त्रिभुवन विश्वविद्यालय शिक्षण अस्पताल महाराजगंजमा वैशाख २३ गते भर्ना भएको, २४ गते डेलिभरी भएको र २५ गते डिस्चार्ज भएपछि उनी सिन्धुपाल्चोक घर गएकी थिइन्। उनलाई कोरोना कहाँ लाग्यो, त्यो थाहा हुन सकेको छैन। घर गइसकेकी उनलाई ज्वरो र श्वासप्रश्वासमा गाह्रो भएपछि स्थानीय अस्पतालमा उपचारका लागि गएकी रहिछिन्। तर त्यहाँबाट धुलिखेल अस्पताल रिफर गरियो। स्वास्थ्य मन्त्रालयको विज्ञप्ति अनुसार अस्पताल आउँदै गर्दा नै उनको मृत्यु भएको हो।
