सामाजिक सञ्जालमा अहिले भारतीय टेलिभिजन च्यानल आजतकको जस्तो देखिने एउटा स्क्रिनसट भाइरल भएको छ जसमा अमेरिकन आइडलको टप सेभेनमा पुगेका नेपाली आर्थर गनलाई भारतको भनिएको दावी छ।
तर यो ‘आजतक’मा प्रसारण भएको समाचारको स्क्रिनसट भने होइन।
हामीले केही समयअघि अहँ, रुसका सडकमा पुटिनले ८ सय वटा सिंह छाडेका छैनन्, फेक न्युज नपत्याउनुस् ! शीर्षकमा एउटा फ्याक्टचेक गरेका थियौँ।
त्यसमा breakyourownnews.com साइटबारे लेखिएको थियो। यो टिभीको स्क्रिनमा देखिए जस्तो गरेर आफैले ब्रेकिङ न्युज बनाउन दिने वेबसाइट हो। अहिले देखिएको स्क्रिनसटमा माथिपट्टी फोटोसप गरेर आजतक र संवाददाताको नाम राखिए पनि दायाँ छेउमा breakyourownnews.com को वाटरमार्क स्पष्टै देख्न सकिन्छ।
त्यो साइटमा गएर हेडलाइन र टिकर हालेपछि ठ्याक्कै यस्तै खालको टिभी स्क्रिनमा देखिएको जस्तो फोटो आउँछ। उदाहरण-
तसर्थ सामाजिक सञ्जालमा अहिले भाइरल गराइएको आर्थर गनसम्बन्धी आजतकको स्क्रिनसट फेक हो। त्यसमा विश्वास नगर्नुस्।