किन चुप छन् प्रधानमन्त्री, राष्ट्रपति, विपक्षी यत्रो घटना हुँदा? विदेशमा भए केही हुने बित्तिकै तुरुन्त वक्तव्य दिन्थे

हिजो शुक्रबार राति नहुनुपर्ने घटना भयो। नख्खुस्थित एनसेल कार्यालय अगाडि बम पड्कियो। कार्यालयमा त केही क्षति पुगेन तर बाटोमा हिँडिरहेका तीन जना घाइते भए। त्यसमध्ये एक जना सिंहप्रसाद गुरुङको आज मृत्यु भएको खबर आयो। यो एउटा कायरतापूर्ण आक्रमण थियो। त्यसैले अहिलेसम्म कसैले पनि हामीले बम पड्काएका हौँ भनेर जिम्मा लिन सकेका छैनन्। यो आतंक फैलाउने काम हो। आतंकवादीको काम हो। विदेशमा भए यस्ता आतंकका घटना सुन्ने बित्तिकै फोन गरेर वक्तव्य दिन्छन् हाम्रा सरकार र राष्ट्रप्रमुखहरु। तर हिजो आफ्नै देशको राजधानीमा यत्रो ठूलो घटना हुँदा पनि अहिलेसम्म न प्रधानमन्त्री बोलेका छन्, न गृहमन्त्रीको तर्फबाट कुनै विज्ञप्ति आएको छ, न राष्ट्रपति बोलेका छन्। न विपक्षमा रहेको पार्टी नै बोलेको छ। कतिसम्म चुप बस्न सकेका!

प्रधानमन्त्री केपी शर्मा ओलीको बर्थ डे रहेछ आज। ठीक हो बर्थ डे मनाए हुन्छ। तर उनका त्यत्रा सहयोगीहरुले एउटा सानो वक्तव्य निकाल्न सक्दैनन् यो घटनामा? अझ खासमा त गएर भेट्नु पर्ने हो आतंकवादीहरुका कारण ज्यान गुमाएका र घाइते भएका परिवारलाई सान्त्वना दिन। म छु, राज्य छ भनेर अनुभूति दिलाउनु पर्ने हो। दोषी कुनै हालतमा बच्दैन, कानुनको कठघरामा उभ्याइन्छ भनेर आश्वस्त पार्नुपर्ने हो। तर यतिको अपेक्षा गर्नु पनि बेकार भयो हगि अब हाम्रा नेताहरुबाट?

गृहमन्त्री रामबहादुर थापा बादल आज अस्पताल गएर घाइते र मृतकका आफन्तलाई भेटे। तर उनीहरुलाई आश्वस्त पार्न सकेनन्। गृह मन्त्रालयको साइट हेरेँ, एक महिना पुरानो विज्ञप्ति रहेछ। यत्रो ठूलो घटनाबारे गृहले एउटा वक्तव्य समेत निकाल्न जरुरी ठानेन। कि शनिबारको विदा मनाइरहेका हुन् गृहको जिम्मा लिनेहरु?

प्रधानमन्त्री केपी शर्मा ओलीको ट्विटर ह्यान्डलमा शुक्रबार साँझ ५ बजे ट्विट गरिएको छ जसमा नेकपाका प्रदेश सभा सदस्यको मृत्युमा आफू मर्माहत् भएको भन्दै परिवारजनप्रति समवेदना प्रकट गरिएको छ। के आफ्ना सांसद मर्दा मात्र प्रधानमन्त्री मर्माहत् हुने हो? एक निर्दोष सर्वसाधारणको मृत्यु आतंककारीले पड्काएको बमका कारण हुँदा प्रधानमन्त्री मर्माहत् छैनन्? उनीहरुको परिवारजनप्रति प्रधानमन्त्रीले ट्विटे समवेदना प्रकट गर्न पनि आवश्यक छैन?

दुई तिहाईको सरकार त यस्तै नै भइहाल्यो। विपक्षी नेपाली कांग्रेसका सभापति शेरबहादुर देउवा बोल्नुपर्दैन? भेट्न जानु पर्दैन घाइते र मृतकका आफन्तलाई?

बरु एउटा नेकपा असन्तुष्ट समूहको नाममा विज्ञप्ति आएको छ यो घटनाबारे।