ट्रेकिङ गर्न अब झनै महँगो तर मोटरसाइकलभन्दा साइकलको प्रवेश शुल्क बढी लगाउने काम अब नहुने भो

सरकारी अफिसहरु बन्द हुने फूलपाती भन्दा एक दिनअघि राजपत्रमा सूचना प्रकाशित गर्दै सरकारले प्रमुख ट्रेकिङ रुट र राष्ट्रिय निकुञ्जहरुको प्रवेश शुल्कमा ठूलो वृद्धि गर्‍यो। सरोकारवाला संस्थाहरुलाई समेत थाहा नहुने गरी एक्कासी पर्यटकको हाइ सिजन सुरु हुँदै गर्दा गरिएको यस्तो शुल्क वृद्धिले पर्ने नकारात्मक असर बिस्तारै देखिँदै जाला। निश्चित मिति राखेर त्यो दिनदेखि बढेको शुल्क लागू गरे भइहाल्थ्यो। नयाँ वर्ष सुरु हुँदैछ इस्वी संवतको। त्यही दिनदेखि लागू हुने भने पनि हुन्थ्यो। तर अकस्मात् मंगलबारदेखि लागू हुने भनियो।

विदेशी पर्यटकहरुको प्रमुख रोजाइमा पर्ने अन्नपूर्ण, गौरीशंकर र मनास्लु संरक्षित क्षेत्रको प्रवेश शुल्कमा ५ सय प्रतिशतसम्म वृद्धि गरिएको छ। यी संरक्षित क्षेत्रमा प्रवेशका लागि सार्क क्षेत्र बाहेकका देशका नागरिकलाई ३ हजार रुपैयाँ शुल्क तोकिएको छ। अघिल्लो दरभन्दा यो १५० प्रतिशत बढी हो। त्यसैगरी सार्क क्षेत्रका देशका नागरिकलाई ५ सय प्रतिशत शुल्क बढाएर १ हजार रुपैयाँ तोकिएको छ। नेपाली नागरिकहरुले पनि अब १०० रुपैयाँ तिर्नुपर्नेछ।

तर एउटा राम्रो काम भने भएको छ है। यसअघि कुन चाहिँले कुन बुद्धिको सल्लाहले हो, शिवपुरी नागार्जुन राष्ट्रिय निकुञ्जभित्र प्रवेश गर्नका लागि मोटरसाइकलको भन्दा साइकलको बढी शुल्क तिर्नुपर्थ्यो। शिवपुरी जाँदा फोटो खिचेको थिएँ मैले केही महिनाअघि।

फोटोमा देख्नुभो होला, मोटरसाइकलको प्रवेश शुल्क मात्र ३० रुपैयाँ थियो भने साइकलको चाहिँ १०० रुपैयाँ छ। त्यसमा भ्याट जोड्न बाँकी नै छ।

साइकल लाँदा साइकलको १०० त तिर्नै पर्‍यो, मान्छेको पनि ५० रुपैयाँ त तिर्नै पर्‍यो नेपाली नागरिकका लागि तोकिएको शुल्क।

अब भने यो शुल्कको दरमा परिवर्तन भएको छ र नयाँ शुल्क यस्तो छ-

अब नेपाली नागरिकका लागि नै १०० रुपैयाँ तिर्नुपर्ने भएको छ। पहिले ५० मात्र तिरे पुग्थ्यो।

मोटरसाइकल र स्कूटरका लागि १५० रुपैयाँ मूल्य तोकिएको छ। यसअघि ३० रुपैयाँमात्रै तिरे पुग्थ्यो। साइकलका लागि भने शुल्क घटाएर २० रुपैयाँमात्रै बनाइएको छ नेपालीका लागि।

नयाँ कुरा के पनि छ भने अब भ्याट भनेर छुट्टै रकम तिर्नुपर्दैन। यही शुल्कमा भ्याट पनि जोडिएको हुनेछ।

कुन राष्ट्रिय निकुञ्जको शुल्क कति बढ्यो, पूरा थाहा पाउन राजपत्रमा प्रकाशित यो सूचना हेर्नुस्–