दर्ता भयो एकीकृत पार्टी, अन्डरलाइन छाडेर ब्राकेटमा

एमाले र माओवादी केन्द्र एकीकृत भएर बनेको पार्टीले पहिलो पटक ब्राकेट छाड्ने जमर्को गरेको थियो। यसअघि एमाले ब्राकेट भित्र नै थियो- नेकपा (एमाले)। माओवादी पनि ब्राकेटभित्र नै थियो। नेकपा (माओवादी)। पछि नेकपा (माओवादी केन्द्र) बन्यो। दुई दल मिलेर नेपाल कम्युनिस्ट पार्टी नाम राख्न खोजेका थिए। तर यो नामको पार्टी पहिले नै दर्ता थियो निर्वाचन आयोगमा। त्यसैले सुरुमा अन्डरलाइन गरेर पार्टी दर्ताको निवेदन दिइयो- नेपाल कम्युनिस्ट पार्टी।  तर त्यसले काम गरेन।

त्यसपछि बाध्य भएर पुनः ब्राकेट कै शरण लिन उनीहरु बाध्य भएका छन्। नयाँ नाम बनेको छ- नेपाल कम्युनिस्ट पार्टी (नेकपा)।

त्यसो त नेपाली नाम राखेको भए पनि हुने थियो। तर ब्राकेटबाट आएका भएर ब्राकेट नै रुचाए। र, निर्वाचन आयोगले आज यो नामको पार्टी दर्ता भएको औपचारिक घोषणा पनि गरेको छ। योसँगै नयाँ पार्टीले वैधानिकता पाएको छ।