यी हुन् पार्टीलाई सहयोग गरेको, समानुपातिकमा परेको ११० उम्मेदवार जो आज विजयी घोषित भए

प्रतिनिधि सभाको निर्वाचन भएको ७० दिनपछि बल्ल निर्वाचन आयोगले बुधबार राति प्रत्यक्ष र समानुपातिकतर्फ विजयी २६५ जनै उम्मेदवारको नाम घोषणा गरेको छ। गत मंसिर १० र २१ गते सम्पन्न प्रतिनिधिसभाको प्रत्यक्षतर्फको १६५ जना विजयी उम्मेदवारको घोषणा यसअघि नै भइसकेको थियो। तर समानुपातिकतर्फको ११० सिटमा कुन दलले कति सिट पाउँछ भन्ने हिसाब आइसके पनि विजयी उम्मेदवारको नाम राष्ट्रिय सभाको निर्वाचन नभएका कारण रोकिएको थियो। संघीय संसदमा एक तिहाई महिला हुनुपर्ने संवैधानिक व्यवस्थाका कारण राष्ट्रिय सभाको निर्वाचन पहिले हुनुपर्ने भयो। सुरुमा त निर्वाचन प्रणाली एकल संक्रमणीय कि बहुमतीय भन्नेमै लफडा पर्‍यो। एकल संक्रमणीयमै जाने भएपछि निर्वाचन भएर परिणाम आएपछि बल्ल आज प्रतिनिधि सभाको समानुपातिक उम्मेदवार विजयी घोषणा भए। निर्वाचन आयोगले बुधबार राति नै राष्ट्रपति विद्यादेवी भण्डारीसमक्ष प्रतिनिधिसभाको प्रत्यक्ष र समानुपातिक निर्वाचनको अन्तिम नतिजासहितको प्रतिवेदन बुझाएको छ। अब नयाँ सरकार गठनको प्रक्रिया सुरु भएको छ। प्रधानमन्त्री शेरबहादुर देउवाले बिहीबार बिहान देशवासीका नाममा सम्बोधन गर्दै राजीनामा दिनेछन् भने माओवादीको समर्थनसहितको पत्र एमालेले राष्ट्रपतिलाई बुझाएपछि केपी ओलीलाई राष्ट्रपतिले संविधानको धारा ६७ (२) अनुसार प्रधानमन्त्री नियुक्त गर्नेछन्। ३० दिनभित्र ओलीले संसदमा विश्वासको मत लिनेछन्। त्यसको दुई वर्षसम्म अविश्वासको प्रस्ताव संसदमा ल्याउन नपाइने प्रावधान संविधानमा छ।