हिजो मनाङे, आज सिलवाल : भूपू डिआइजी ‘फरार’, पक्रन देशभर सर्कुलर

हिजो भूपु डन दीपक मनाङे समाचारमा थिए, आज भने भूपू डिआइजी नवराज सिलवाल। दुवै सांसद निर्वाचित भइसकेका तर शपथ बाँकीवाला। मनाङे प्रदेश सभाका सिलवाल प्रतिनिधि सभाका। हिजो मनाङेलाई १० वर्षअघि नै पाँच वर्ष जेल सजाय भएको र त्यो सदर भएको खबर आएको थियो। आज भने नवराज सिलवाल फरार रहेकोले पक्रन देशभरका सातै वटा प्रदेशका प्रहरी कार्यालयमा भएको सर्कुलर सार्वजनिक भएको छ।

मुद्दा उही हो कीर्ते काण्डको। आफूलाई आइजी बनाई पाउँ भन्दै उनले सर्वोच्च अदालतमा दर्ता गरेको रिट निवेदनमा उनले आफ्नो कार्य सम्पादन मूल्याङ्कनको प्रतिलिपि पनि पेश गरेका थिए, जुन उनको हातमा कानुनी रुपमा पर्नै नसक्ने कुरा हो। किनकि यो गोप्य हुन्छ। अझ उनले पेश गरेको कासमू कीर्ते भएको त्यसमा प्रयोग भएका दुई फरक फन्टका कारण नाङ्गै आँखाले समेत देखिन्छ।

सर्वोच्च अदालतले पनि उनैले गैरकानुनी हिसाबले यो फाइल प्राप्त गरी तोडमरोड गरी इजलासलाई भ्रममा पारेको भन्दै आफ्नो फैसलामा लेखिसकेको छ र यस विषयमा छानबिन गर्न आदेश दिएको छ।

छानबिनमा सहयोग गर्नुपर्ने भूपू डिआइजी सिलवाल उल्टै भागी हिँडिरहेका छन्। विदेशमा छु भने पनि उनी नेपालमै रहेको प्रहरीले सुइँको पाइसकेको छ त्यसैले सर्कुलर जारी भएको छ देशभरका प्रहरी कार्यालयमा जहाँ भेटिए पनि पक्रेर काठमाडौँ पठाउन।

के गर्नु, अहिले त सर्वोच्च अदालतमा सुशीला कार्की पनि छैनन् उनी पक्राउ परे बन्दी प्रत्यक्षीकरणको रिट भन्दै मुक्त गर्न आदेश दिन। सांसद निर्वाचित भइसके तर एमाले पनि केही बोल्दैन। बिचरा भूपू डिआइजीको कहाँ कुन ग्रह खराब भएको हो!