‘कान्तिपुर’ मा प्रचण्डको हाफ पेज विज्ञापन

‘कान्तिपुर’ लगायत कुनै पनि दैनिक अखबारमा शीर्ष नेताले विज्ञापन छापेको देख्नुभएको छ? हरेक दिन उनीहरुकै फोटो र समाचारले भरिएको हुन्छ पत्रिका। विज्ञापन किन छाप्नु पर्‍यो र भन्ने लाग्न सक्छ। तर परिस्थिति यस्तै भइदियो भने शीर्ष नेताले पनि विज्ञापन छाप्नु पर्ने स्थिति आउँदो रहेछ।

आज बिहीबारको कान्तिपुर दैनिकमा माओवादी केन्द्रका अध्यक्ष पुष्पकमल दाहाल ‘प्रचण्ड’ को व्यक्तिगत पारिवारिक विज्ञापन छापिएको छ। कान्तिपुरमा मात्रै हैन नयाँ पत्रिका दैनिकमा पनि विज्ञापन छापिएको रहेछ।

कान्तिपुर दैनिकको आठौँ पेजमा प्रचण्ड र उनकी पत्नी सीता दाहालको नाममा हाफ पेजको श्रद्धाञ्जलि विज्ञापन छापिएको छ। आइतबार निधन भएका छोरा प्रकाश दाहालप्रति भावपूर्ण श्रद्धाञ्जलि अर्पण गर्दै विज्ञापन छापिएको हो।

विज्ञापनमा समवेदना र सदभाव प्रकट गर्ने स्वदेश तथा विदेशका सबैलाई हार्दिक कृतज्ञता पनि जनाइएको छ। सामान्यतया विज्ञप्तिमात्रै प्रकाशित गर्ने शीर्ष नेताहरुले विज्ञापनै छापेको यो दुर्लभ अवसर हो। प्रचण्डको नाममा विज्ञापन छापिएको चाहिँ यही पहिलो अवसर हो। यसअघि चुनाव प्रचारका विज्ञापन पार्टीको नाममा चाहिँ छापिन्थ्यो।

कति पर्दो रहेछ त यस्तो विज्ञापन छाप्न?

अरु पत्रिकामा समवेदना विज्ञापनमा छुट हुने भए पनि कान्तिपुरमा भने छुट देखिएन। एउटा विज्ञापन एजेन्सीबाट प्राप्त रेट अनुसार भित्री पेजमा छापिएको यो विज्ञापनको दर प्रति सिसी ६०० रुपैयाँ पर्छ। कति सिसीको विज्ञापन हो यो चाहिँ विज्ञापन नापेपछि थाहा हुन्छ।