मिडियाले बनाएका गृहमन्त्री र परराष्ट्रमन्त्री

मिडियाको कुरा पत्याउने हो भने कात्तिक ७ गते नै प्रधानमन्त्री शेरबहादुर देउवाले मन्त्रिपरिषद्को जिम्मेवारी हेरफेर गरिसके। अनि गृह मन्त्रालयको जिम्मा मोहनबहादुर बस्नेत र परराष्ट्र मन्त्रालयको जिम्मा ज्ञानेन्द्रबहादुर कार्कीलाई दिइसके। एउटा मात्र हैन, अनेक मिडियाले लेखेको समाचार हो यो। एउटा झुठ पनि अनेक पटक गरेपछि सत्य जस्तो लाग्छ। यहाँ त मिडियाकै कुरा पर्‍यो। कात्तिक ७ गते यस्तो समाचार आए पनि आज कात्तिक ९ गते भइसक्दा पनि देउवाले गृह र परराष्ट्र मन्त्रालय आफैसित राखेका छन्। प्रधानमन्त्री देउवाका वरिष्ठ सञ्चार विज्ञ गोविन्द परियारसित आज दिउँसो बुझ्दा उनले भने, ‘सब फेक न्युज हुन्। कसैलाई गृह र परराष्ट्रको जिम्मेवारी दिइएको पनि छैन र दिने तयारी पनि छैन।’ अर्थात् गृहमन्त्री र परराष्ट्र मन्त्री मिडियाले आफै बनाएका रहेछन्। अचम्म त के छ भने, समाचार झुटो भइसक्दा पनि न सच्याउनु पर्छ भन्ने लागेको छ मिडियालाई, न साँचो कुरा के हो भनेर बताउनै पर्ने भएको छ। हेरौँ मिडियाले बनाएका गृहमन्त्री र परराष्ट्र मन्त्रीको नमूना।

यी त केही नमूना मात्र हुन्। अरु पनि धेरै मिडियाले यसैगरी गृहमन्त्री र परराष्ट्र मन्त्री बनाइदिएका छन्।

अहिले फेरि अर्को हल्ला चलेको छ- गगन थापालाई नेपाली कांग्रेसले प्रवक्ता बनायो भनेर। कतै पनि आधिकारिक रुपमा नआएको र गगन थापा स्वयंले पनि हो भनेर नभनिसकेको यो कुरा पनि मिडियाले आफै घोषणा गरेको हो। गजब छ। यस्तै चलिरहेको छ।