अब माओवादीका १७ बेरोजगार मन्त्रीहरु के गरी बस्लान्?

मंगलबार बिहानसम्म माओवादीले दिउँसो पत्रकार सम्मेलन गरी सरकार छाड्ने कुरो थियो। गृहमन्त्री जनार्दन शर्माले दिउँसो २ बजे पत्रकारलाई पनि डाकेका थिए सिंहदरबारमा। सरकार छाड्ने घोषणा गर्ने भन्ठानिएको पत्रकार सम्मेलनमा मन्त्री शर्माले त तत्काल सरकार नछाड्ने घोषणा पो गरे। किन त भन्दा निर्वाचन सार्न लागेको सूचना निर्वाचन आयोग लगायतबाट प्राप्त भयो। त्यही भएर तत्काल सरकार नछाड्ने निर्णयमा पुगेका रे- शर्माले त्यही भने। पत्रकारहरुले पत्याएनन्। कुन चाहिँ निर्वाचन सार्न लागेको पहिलो चरण कि दोस्रो चरण? कति दिन सार्न लागेको भनेर सोध्दा शर्माले भने- त्यसबारे जानकारी छैन। सरकारमा बस्न फन्डा पो गरेको हो कि भनेर सोध्दा उनले केही घण्टामा सत्यतथ्य थाहा पाउनु हुनेछ, हामी सरकारमा बस्न त्यति लोभी छैनौँ भने। उनले केही घण्टामा सत्यतथ्य थाहा पाउनु हुनेछ भने पनि मंगलबार रातिसम्म निर्वाचन सार्ने बारे केही पनि खबर आएन। बरु साँझ माओवादीका सबै मन्त्री जिम्मेवारीविहीन भई बिना विभागीय बनाइएको खबर आयो।

गृहमन्त्रीले के भनेका थिए? सुन्नुस्

अपमान सहेर माओवादी मन्त्रीहरु सरकारमा बसिनरहने भनेर माओवादी नेतृत्वले बताएको खबर हिजोअस्तिसम्म सुन्न पाइन्थ्यो। तर प्रधानमन्त्रीले कामै नदिए पनि विभागै नभएर खाली तलब सुविधामात्र खान भए पनि १७ जना मन्त्री बनेरै बसेको देखियो।

यदि निर्वाचन सार्ने नै षड्यन्त्र प्रधानमन्त्रीले गरेको हो भने पनि माओवादी मन्त्रीहरुले के गर्ने होला त नि मन्त्रिपरिषद्मा बसेर? उही अस्ति संसदमा केपी ओलीले भने जस्तो कुस्ती खेल्ने? बिना विभागीय मन्त्री बनेर चाहिँ चुनाव ठीक टाइममा हुने रहेछ कि के हो?

सरकार छाड्ने भनेर तयार भइसकेको माओवादीलाई (शर्माका अनुसार सरकार छाड्नेबारे चिट्ठीसमेत लेखिसकेको) के कारणले सरकार नछाड्ने मनस्थितिमा पुर्‍यायो, त्यो अझैसम्म थाहा हुन सकेको छैन। यो कुरा रहस्यको रहस्यमै छ। एउटा अनुमान चाहिँ यो मुद्दालाई लगाइएको छ-

राजपाका नेता सर्वेन्द्रनाथ शुक्लले दायर गरेको यो रिटमा आगामी निर्वाचनमा मतपत्र चार वटा बनाउनु पर्ने (अहिले निर्वाचन आयोगले दुई वटा बनाएको छ), प्रत्यक्षतर्फको उम्मेदवार मनोनयन दर्ताको तालिका सार्नुपर्ने माग गरिएको छ। आजै यसको निर्णय सुनाउने जस्तो कुरा थियो तर बहस नसकिएपछि बुधबारका लागि सरेको छ। बजारको हल्ला सर्वोच्चले माग अनुसारको निर्णय गर्ने र यसैलाई बहाना बनाएर निर्वाचनको मिति सार्ने रे। खैर, अब भोलि निसु भएपछि थाहा पाइने नै छ।

यता, प्रचण्डले सहमति अनुसार राजीनामा दिएर देउवालाई प्रधानमन्त्री बन्न बाटो खोलिदिएको भनेर इमान्दारिताको वाहवाही कमाएको माओवादी सत्तामा बसेर प्रतिपक्षसँग चुनावी तालमेल गर्नेदेखि सरकारमा टाँसिरहनेसम्मको इमान्दारिताको अर्को रुप पनि देखियो।

अब यदि बजार हल्ला अनुसार चुनाव सार्ने निर्णय भइहाल्यो भने पनि यी काम नदिइएका बेरोजगार मन्त्रीहरुले गर्ने चाहिँ के होला? क्याबिनेट मै चुनाव सार्न पाइँदैन- पाइँदैन ! पाइँदैन !! भनेर नाराबाजी गर्ने पो हुन् कि