को होला नेपाल आइडलको टप थ्रीमा पुग्ने तीन जना?

गायन सम्बन्धी एपी वान टेलिभिजनबाट प्रसारण हुँदै गरेको रियालिटी टिभी शो नेपाल आइडलमा बाँकी रहेका चार प्रतिस्पर्धीहरुमध्ये एक जना बाहिरिएपछि ग्रान्ड फिनालेका लागि तीन जना छानिने छन्। तीनै जनाले नगद रकमसहित अन्य पुरस्कार पाउँदैछन्। ग्रान्ड फिनाले असोज ६ गते कतारको दोहामा हुँदैछ। त्यसका लागि दुई हप्ता बाँकी छ। आज एक प्रतियोगी बाहिरिएपछि ग्रान्ड फिनाले अगाडिका दुई हप्ता कस्तो कार्यक्रम प्रसारण हुने हो, स्पष्ट छैन। आइडल सिरिजमा विदेशमा भएका कार्यक्रमहरुमा वाइल्ड कार्ड इन्ट्रीका रुपमा बाहिरिसकेका प्रतियोगीहरुलाई फेरि प्रवेश गराउने गरिए पनि नेपाल आइडलमा अहिलेसम्म त्यसको प्रयोग भने भएन। टप थ्रीमा पुग्नबाट वञ्चित को होला त?

भोटिङ प्याटर्न बुझ्नका लागि माइसंसारले दुई हप्ता राखेको पोलको नतिजा यस्तो रह्यो-

यस्तै खालको भोटिङ हुने हो भने टप थ्रीमा पुग्नबाट प्रताप दास वञ्चित हुने देखिन्छ।

नेपाल आइडलको अहिलेसम्मको भोटिङ प्याटर्न हेर्ने हो भने यस्तो देखिन्छ-

बुद्ध लामालाई अहिलेसम्म धेरै भोट आएको देखिन्छ। उनी अहिलेसम्म गत साता एक पटक मात्र डेन्जर जोनमा (कम भोट आएका आधारमा बटम थ्रीमा) परेको देखिन्छ। प्रताप दासलाई सबैभन्दा कम भोट आएको देखिन्छ। उनी चार पटक डेन्जर जोनमा परेका थिए भने त्यसमध्ये तीन पटक त कम भोट ल्याउने दुई जनामा परेको देखिन्छ। कम भोट ल्याउने दुई जना मध्ये अर्को प्रतिस्पर्धीले उनीभन्दा कम भोट ल्याएकोले तीन पटक उनी बचेका हुन्।

त्यस्तै निशान भट्टराई दुई पटक डेन्जर जोनमा परिसकेका छन्। त्यसमध्ये एक पटक त उनी बटम टुमा नै परेका छन्। सागर आले भने अहिलेसम्म एक पटक मात्र डेन्जर जोनमा परेका छन्। उनी बटम टुमा परेको रेकर्ड छैन।

त्यसैले नेपाल आइडलको अहिलेसम्मको भोटिङ प्याटर्न हेर्दा सबैभन्दा बढी भोट बुद्ध लामाले, त्यसपछि सागर आलेले पाएको देखिन्छ। तेस्रो बढी भोट पाउने निशान भट्टराई रहेका छन् भने सबैभन्दा कम भोट प्रताप दासले पाएको देखिन्छ।

तर यो प्याटर्न यस्तै अवस्थामा टप फोरको रिजल्टमा देखिन्छ भन्ने छैन। प्रताप दास जब जब बटम टुमा परेका छन्, त्यसको अघिल्लो साता फ्यानहरुको बढी भोटका कारण उनी सेफ हुन पुगेको देखिन्छ। गत साता उनी बटम टुमा परेका थिए। यदि उनी यस पटक पनि यसैगरी सेफ हुन पुगे भने अर्का कम भोट ल्याउने प्रतिस्पर्धी आउट हुनसक्नेछन्।

को हुनेछ त्यो प्रतिस्पर्धी? दुई पटक डेन्जर जोन (एक पटक बटम टुमा समेत) परिसकेका निशान वा एक-एक पटक डेन्जर जोनमा परेका सागर वा बुद्ध?

हेर्न रमाइलो हुनेछ।