आफ्नो हत्याको षड्यन्त्र भएको लोकमानको दावी, ज्यान सुरक्षित भएपछि बल्ल नेपाल फर्कने रे

अहो, त्यतिबेलाको कुरा के गर्ने र। समानान्तर सत्ता चलाएका थिए अख्तियार प्रमुख लोकमान सिंह कार्कीले। तर अति गर्नु अतिसार नगर्नु भन्ने उखान पालना नगरेपछि लोकमानको त्यत्रो साम्राज्य गर्ल्यामगुर्लुम्मै ढल्यो। सुरुमै केही नेताहरुलाई पाता कस्ने मौका थियो तर नेतालाई नछोएसम्म केही हुन्न भनेर बसेका लोकमानको आँखा खुल्दासम्म अबेर भइसकेको थियो। हतारहतारमा लडाकु शिविरको फाइल खोल्नेदेखि एमालेका केही नेताहरुलाई अकुत सम्पतिमा तान्नेसम्मका प्रपञ्च गरे। तर त्यसअघि नै महाभियोगको अस्त्र फ्याँकेर उनको हातखुट्टा बाँधियो। त्यसपछि सुशीला कार्की नेतृत्वको सर्वोच्च अदालतले उनलाई फ्याँकिदियो। त्यसपछि चुपचाप विदेश पलायन भए उनी। लामो समय चूप रहेका उनी अहिले फेरि बोल्न थालेका छन्।

घटना र विचारसँग कुरा गर्दै लोकमानले आफ्नो हत्याको षड्यन्त्र भएको दावी गरेका छन्। यतिबेला उनी कहाँ छन् कसैलाई थाहा छैन। उनी क्यानाडामा गएको भन्ने अनुमान गरिएको छ। तर क्यानाडामा पनि त्यति धेरै नेपालीहरु छन्। लोकमान घरैमा र कोठैमा बसिरहने त हैन होला। यसो बाहिर निस्कँदा वर्दा कोही नेपालीले त भेट्नु पर्ने हो, खै कसैले भेटेका रैनछन् कि के हो।

उनले अन्तर्वार्तामा भनेका छन्- मलाई टेलिफोनमा ज्यान लिनेलगायतका धम्की आउन थाल्यो, मेरो मुभमेन्ट हुने सम्भावित ठाउँहरूमा शङ्कास्पद मानिसका गतिविधि बढ्न थाल्यो । त्यस्तो अवस्थामा मैले आफू हुँडारहरूको बीचमा फसेको हरिणझैँ महसुस गरेँ र ज्यान जोगाउन अनेक उपाय गर्ने क्रममा बिदेसिन पुगेँ।

के कहिल्यै नफर्कने त भन्ने प्रश्नको उत्तरमा उनले भनेका छन्- मेरो ज्यान सुरक्षित रहन्छ भन्ने विश्वास भएका दिन म स्वदेश फर्कन्छु । त्यो भोलि नै पनि हुन सक्छ र थप केही समय लाग्न पनि सक्छ।

कसबाट असुरक्षा रे त उनलाई? उनले भनेका छन्- केही पुराना व्यापारिक घरानाका व्यक्ति, केही राजनीतिक दलका नेता र उच्च तहबाट अवकाशप्राप्त केही प्रहरी अधिकृतहरूले मेरो हत्या गर्नेसमेतको षड्यन्त्र रचेको सुइँको पाएपछि म नेपाल छोड्न बाध्य भएको हुँ । जसले मुलुकमा ब्रह्मलुट गरिरहेका छन् र जो लोकतन्त्र आफ्नो कब्जामा लिएर मनपरीतन्त्र चलाउँदै छन्, तिनले ममाथि दागा धरे।