हैट, लाजै लाग्यो मिस नेपाल आयोजकहरुको यो पारा देखेर

ब्युटी विद् दि ब्रेन – सुन्दरी प्रतियोगिता आयोजकहरुको एउटा राम्रो बहाना हो। बौद्धिक व्यक्तित्व अनि त्यसमाथि सौन्दर्य। अहा!

तर नेपालमा ब्युटी विद् दि ब्रेन खोज्ने जिम्मा लिएका अर्थात् मिस नेपालका आयोजकहरुको पारा देख्दा चाहिँ लाजै लाग्ने रहेछ। मिस नेपाल २०१७ को घोषणा गर्ने कार्यक्रममा एउटा प्रेस विज्ञप्ति बाँडिएको थियो। त्यो प्रेस विज्ञप्ति यति लाजमर्दो छ कि नेपाली भाषाप्रेमीहरुले देखे भने आफ्नो टाउको आफैले भित्तामा ठोक्लान् भन्ने डर छ।

एउटा नमूना हेर्नुस्- मिस नेपालमा सहभागी हुने र जित्नेहरुले के पाउँछन्? विज्ञप्तिमा भनिएको छ- ‘युवतीहरुको जीवनमा नै काल्पनिक सीपभित्र तर्क मुक्त प्रस्तुती करण गर्न सक्षम बनाउने’

हे राम, राम! के हो यो काल्पनिक सीप भनेको? अझ त्यसभित्र तर्क मुक्त प्रस्तुती करण गर्न सक्षम बनाउने रे। तर्कमुक्तको अर्थ हो तर्कै नचाहिने। काल्पनिक अर्थात् कल्पनाको सीपमा तर्क के खान चाहियो त!

अझ रमाइलो नमूना भित्र हेर्नुस्।

विज्ञप्तिको सुरुमै ‘नेपालको असाधारण विलक्षण कुमारीहरुको अन्वेषण गर्ने’ उल्लेख छ। अनि आफूले आफैलाई नेपालको अति प्रतिष्ठित सौन्दर्य प्रतियोगिताको उपमा दिइएको छ।

विज्ञप्तिको दोस्रो अनुच्छेदको वाक्य अजीबको छ।

तेस्रो अनुच्छेदमा त मुख्य प्रायोजकको विशिष्ट योगदानले समारोहका गरिमा पूरै देशको गरिमा बन्न पुगेको उल्लेख छ। अचम्म ! मुख्य प्रायोजकले गर्ने काम भनेको मिस नेपाल आयोजकलाई रकम दिने न हो। त्यो काम कसरी पूरै देशको गरिमा बन्न पुग्यो त? खै पुष्टिको आधार? अनि त्यसैमा मुख्य प्रायोजक रुसलान एफएम (भोडकाले छायाँ विज्ञापन गर्न बनाएको ब्रान्ड) को उत्कृष्ठ प्रसारणबाट अति रोमान्चित र नवीन शक्ति प्राप्त गर्न सकिने यथार्थ रुपमा देखिन्छ रे। हैट। के भन्या हो?

चौथो अनुच्छेदमा मोबाइल प्रविधिमा रहस्यमय सफलता प्राप्त भएकोमा गर्व गरिएको पनि कति नसुहाउँदो !

छैटौँ अनुच्छेदमा प्रतियोगीहरुले अनुमानबाटै जीवन पछिसम्म सुखमय र शान्तिमय बनाउने अभिप्राय राखिएको छ।

अन्तिम अनुच्छेदमा प्रतियोगितामा भाग लिन नेपाली नागरिकता र नेपाली पासपोर्ट नै भएको हुनुपर्ने भनिएको छ। सँगै गैर नेपाली नागरिकले पनि उल्लेखित मापदण्ड अनुसार प्रतियोगितामा भाग लिन सकिने भनिएको छ। कति हाँस्नु ! नेपाली नागरिकता र नेपाली पासपोर्ट नेपाली नागरिकले पो पाउने, गैर नेपालीले पाउँछन् र? नेपाली नागरिकता हुनुपर्ने तर गैर नेपालीले पनि भाग लिन पाउने भनेको के ? कोही होला तपाईँको मिस नेपालका आयोजकलाई चिन्ने, सोधी हेर्नुस् है। अति भो यो त! यस्ताले उत्पादन गर्ने सुन्दरीको बुद्धि कस्तो हुने हो, कठै !

हेर्नुस् विज्ञप्ति, तपाईँले पनि यस्तै केही देख्नुभयो भने लेख्नुस् है तल कमेन्टमा