चीनमा ओहोदाको प्रमाणपत्र दुई पटक बुझाउने चलन रैछ – सक्कली र कपि

‘चीनमा हाम्रो राजदूतको हैसियत’ शीर्षकको ब्लग माइसंसारमा नोभेम्बर २३ मा पढ्नुभएको होला। चीनका लागि हाम्रा नवनियुक्त राजदूत लीलामणि पौड्यालले आफ्नो ओहोदाको प्रमाणपत्र भर्खरै बुझाएको बारे समाचार र फोटो अन्नपूर्ण पोस्टमा हेर्दा अचम्म लागेको बारे छोटो ब्लग थियो त्यो। हाम्रा राजदूतले चीनमा विदेश मन्त्रालयमा शिष्टाचार महाशाखा हेर्ने उप महानिर्देशक चाङ् यिमिङसमक्ष बेइजिङ्मा ओहोदाको प्रमाणपत्र बुझाएको फोटो थियो त्यसमा। राष्ट्रपतिलाई नै किन नबुझाएको होला भन्ने जिज्ञासा चैँ भर्खर शान्त भएको छ। खासमा चीनमा दुई पटक ओहोदाको प्रमाणपत्र बुझाउने रैछ सक्कली र कपि। सक्कली चैँ राष्ट्रपतिलाई बुझाउने रैछ अनि कपि चाहिँ अर्कैलाई बुझाएर काम थाल्न मिल्ने रैछ। हाम्रो देशमा त्यस्तो चलन छैन त्यही भएर हामीलाई थाहा नभएको रहेछ।

हाम्रो देशमा राष्ट्रपति सेरेमोनियल हुन्। तर कार्यकारी राजा भएका बेला पनि यसरी हाम्रो देशमा अरुलाई ओहोदाको प्रमाणपत्रको कपि बुझाउने चलन भने देखेको थिइनँ। त्यसैले अन्नपूर्ण पोस्टको समाचार र फोटो देखेर पत्याएको थिएँ। गलत रहेछ। त्यतिबेलाको हेडलाइनले गलत अर्थ दिएको बल्ल थाहा पाएँ। माफ पाउँ हजुर। अर्काको विश्वास गर्दा यस्तो पर्‍यो। अब अरुतिर पनि यसो हेरेर बुझेर हेडलाइन बनाउन हतार गर्नुपर्ला।

खासमा चीनियाँ विदेश मन्त्रालयको साइटले त्यतिबेला नै कपि अफ क्रिडेन्सियल भनेर हालिसकेको रहेछ।

खासमा चीनमा नेपालमा भन्दा फरक रहेछ चलन। चीनमा ओहोदाको प्रमाणपत्र बुझाउने काम वर्षमा तीन पटक मात्र हुने रहेछ। त्यही लटमा पारेर होलसेलमा बुझाउनु पर्ने रहेछ। यदि त्यो बुझाउने समय बाँकी छ भने अर्कै जुनियर व्यक्तिलाई ओहोदाको प्रमाणपत्रको कपि बुझाएर कामचलाउ गर्न मिल्ने रहेछ।

तर त्यसरी कामचलाउ गरेका राजदूत राष्ट्रपति सहभागी कार्यक्रममा भने सहभागी हुन नपाउने रैछन्। अर्थात् त्यतिबेला जब हाम्रा राजदूत पौड्यालले चीनका शिष्टाचार महाशाखा हेर्ने उपमहानिर्देशक समक्ष ओहोदाको प्रमाणपत्रको कपि बुझाएका थिए त्यसपछि उनले काम थाल्न पाए पनि राष्ट्रपति सहभागी भएका कुनै कार्यक्रममा सहभागी हुन योग्य हुने थिएनन्।

अब उनले राष्ट्रपतिलाई नै ओहोदाको प्रमाणपत्र बुझाइसकेपछि भने उनी फूल राजदूत भइसके।