बत्ती निभ्दा पनि चासो र समाचार बन्ने भयो नेपालमा

सोमबार साँझ पौने ६ बजे अकस्मात् देशभर बत्ती गयो। पहिले भए यो बेला कति ठाउँमा लोडसेडिङका कारण बत्ती गइरहेको हुन्थ्यो, त्यति मतलब हुने थिएन। तर तिहारदेखि लगातार बत्ती आइरहेको बेला लगभग ४५ मिनेट बत्ती गएपछि भने मान्छेमा निकै चासो बढ्यो। पहिले भए लोडसेडिङ समाचार हुन्थ्यो। बत्ती जानु नियमित घटना जस्तो भएकोले समाचार बन्दैन थियो। बने पनि चासो हुँदैन थियो। यस पटक भने बत्ती जाँदा पनि समाचार बन्यो र त्यसमा मान्छेहरुको चासो पनि निकै भयो- आखिर बत्ती किन गयो? त्यसो त केही अघि मुसा बिरालोको खेलका कारण पनि राजधानीका केही ठाउँमा बत्ती गएको थियो। कतै यो त्यस्तै मुसा ठोक्किएर ट्रान्सफर्मर जल्ने तर मुसा नभेटिने, लगत्तै बिरालो ठोक्किने र ट्रान्सफर्मर जल्ने भन्दै असफल बनाउने खेल त हैन भन्ने पनि शंका जाग्नु स्वभाविक थियो। तर यो पटक त्यस्तो हैन रहेछ। सबभन्दा फरक यसपालि विद्युत प्राधिकरणको नेतृत्वले देखाएको जिम्मेवारी नै थियो।

प्राधिकरणका एमडी कुलमान घिसिङले तत्काल सिस्टम कोल्याप्सका कारण बत्ती गएको भन्दै उपभोक्तासँग माफी पनि मागे। पहिले पनि यसरी सिस्टम कोल्याप्स भएर बत्ती जाने गर्थ्यो। तर मैले अहिलेसम्म कुनै एमडीले यसरी सरी भनेको थाहा पाएको थिइनँ।

फेरि अनौठो त के छ भने यसरी यति लामो समय बत्ती जाँदा पनि उनको यो स्टायटसमा गालीगलौज हैन समर्थनका कमेन्टहरु पो भरिएका छन्।

विद्युत प्राधिकरणका प्रवक्ता प्रवल अधिकारीले किन बत्ती गएको भन्ने बारे प्राविधिक जानकारी नै पोस्ट गरे


यद्यपि प्रवक्ता अधिकारीको फेसबुक पोस्ट ‘पब्लिक’ थिएन। अर्थात् उनका फेसबुक फ्रेन्ड र उनले ट्याग गरेका व्यक्ति बाहेक अरुले उनको स्टायटस हेर्न असमर्थ हुन्थे। प्राधिकरणको फेसबुक पेज खोलेर त्यसमा अपडेट भए वा आफ्नो पोस्टलाई पब्लिक र फलो गर्न मिल्ने बनाए सबैलाई सजिलो हुन्थ्यो। (कसरी गर्ने भन्ने जानकारी यहाँ छ)

प्राधिकरणका कर्मचारी नै छक्क परे आज। प्राधिकरणको विद्युत गृह संचालन सम्भार विभागको प्रमुख* (यसअघि पावर ट्रेड विभाग प्रमुख पद उल्लेख भएछ। गल्ती सच्याइएको छ)-

उता कान्तिपुर भने ऊर्जा मन्त्री र कुलमान घिसिङको अवगुण खोतल्न आज ‘सफल’ भएको छ। आजको अङ्कमा कान्तिपुरले ऊर्जामन्त्री जनार्दन शर्मा र राज्यमन्त्री सत्यनारायण भगतले अनधिकृत रूपमा विद्युत् प्राधिकरणका दुई आयोजनाका एक/एकवटा विलासी गाडी जबर्जस्ती झिकाई चढ्न थालेको समाचार दिएको छ। समाचारमा ‘प्राधिकरणका वर्तमान कार्यकारी निर्देशक कुलमान घिसिङले दबाब थेग्न नसकेपछि मन्त्री शर्मा र राज्यमन्त्री भगतले आयोजनाका विलासी गाडी लगेर चढ्न थालेको जानकारी’ प्राधिकरण स्रोतले दिएको भनिएको छ।

सँगै घिसिङ खत्तम, पुरानै एमडी मुकेश काफ्ले ठीक भन्ने पाराले यो लाइन पनि घुसाइएको छ-

तत्कालीन प्रधानमन्त्री केपी ओली र तत्कालीन ऊर्जामन्त्री टोपबहादुर रायमाझीले समेत प्राधिकरण मातहतका आयोजनाका विलासी गाडी चढ्न खोजेका थिए । प्राधिकरणका तत्कालीन कार्यकारी निर्देशक मुकेश काफ्लेले दिन नमानेपछि उनीहरूले प्राधिकरणको गाडी चढ्न पाएनन् ।

कान्तिपुरको समाचार पढ्न क्लिक गर्नुस्।