एन्फामा थापाकाजीहरुको रजगज : १५ वर्ष कमल थापा, २० वर्ष गणेश थापा, अब गौरव थापालाई बाटो बनाउँदै?

नेपाली फुटबलको सर्वोच्च संस्था अखिल नेपाल फुटबल संघ (एन्फा) थापाकाजीहरुकै बिर्ता जस्तै देखियो। यो संस्थामा १५ वर्ष कमल थापा अध्यक्ष रहे। बीचमा केही वर्ष ग्याप भयो। त्यसपछि उनकै भाइ गणेश थापा अध्यक्ष भएर आए। फिफाले भ्रष्टाचार मुद्दामा जरिवानासहित १० वर्ष फुटबलसम्बन्धी कुनै पनि गतिविधिमा भाग लिन नपाउने गरी प्रतिबन्ध लगाएपछि अब त थापाहरुबाट मुक्त होला भनेको के हुन्थ्यो र।

प्रतिबन्ध लगाए पनि एन्फामा गणेश थापाकै हालिमुहाली चलिरहेको थियो। एन्फाकै गाडी चढेर हिँडिरहेका छन् अहिले गणेश थापा। कार्यवाहक अध्यक्षमा उनकै विश्वासपात्र नरेन्द्रलाल श्रेष्ठ थिए। फिफा र एएफसीले नयाँ निर्वाचन गर्न भनेपछि आज निर्वाचन भयो। तर नतिजा थापाकै पक्षमा गयो।

५ भोटले कर्माछिरिङ शेर्पालाई पराजित गरे गणेश थापाका विश्वासपात्र नरेन्द्रलाल श्रेष्ठले अध्यक्ष पदमा। उपाध्यक्ष पदमा त झन् गणेश थापाको आफ्नै सालो मणि कुँवर विजयी भए।

नरेन्द्रले विजयी हुने बित्तिकै फिफाको कारबाही भोगेका गणेश थापाको योगदानको गुणगान गाउनुबाट नै उनी थापाको मोहरामात्र हुन् भन्ने स्पष्ट हुन्छ। उनले विजयी भएपछि भने- ‘पुरानो नेतृत्वले पनि फुटबलमा धेरै गुण लगाउनु भएको छ। त्यसलाई सबैले मान्नुपर्छ। फुटबललाई यो स्टेजसम्म पुर्‍याउन उहाँले पनि योगदान गर्नुभएको छ। त्यसैलाई निरन्तरता दिँदै अझ नयाँ-नयाँ काम गर्नु हाम्रो कर्तव्य हो।’

गणेश थापाले नतिजा आफ्नो पक्षमा ल्याउन अनेक हत्कण्डा अपनाए। नत्र यस अघि सदैव गणेश थापाको अत्याचार विरूद्ध लड्दै आएको मनाड्ग मर्स्याड्दी क्लब र त्यसका संस्थापक टासी घले यस पटक गणेश थापा क्याम्पमा कसरी पुग्थे? मानार्थ अध्यक्षको सेरेमोनियल पद दिएर उनलाई थापा क्याम्पमा पारियो।

अब शायद् गणेश थापाका छोरा गौरव थापाका लागि थापाकाजीहरु बाटो बनाउँदै छन्।

संसदको लेखासमितिले भ्रष्टाचार भएको भनेर किटान गर्दासमेत अख्तियार प्रमुख लोकमानसिंह कार्कीले यो विषयमा छानबिन अगाडि बढाएका थिएनन्। लोकमान अब ओरालो लाग्दैछन् तर एन्फामा थापाहरु ओरालो लाग्ने कुनै संकेत देखिन्न। सोमबारकै दिन जय गणेश जय गणेशको भजन एन्फामा गुन्जियो।