परिपक्व भएँ भन्ने प्रचण्डले पहिलो हप्तामै गरेका यी गल्ती

पुष्पकमल दाहाल ‘प्रचण्ड’ ले दोस्रो प्रधानमन्त्री हुनुअघि भनेका थिए- पहिलो चोटी प्रधानमन्त्री हुँदा अनुभव थिएन। अहिले त परिपक्व भएँ। तर प्रधानमन्त्री भएको पहिलो हप्तामै उनले केही गल्ती गरेका छन्। यसो हेर्दा यीमध्ये केही सामान्य नै लागे पनि परिपक्व हुनेले गरिरहने गल्ती होइन यो।

१) छोरोलाई स्वकीय सचिव

प्रचण्डले प्रधानमन्त्रीको शपथ ग्रहण गरेको भोलिपल्ट आफ्नो छोरा प्रकाश दाहाललाई स्वकीय सचिव नियुक्त गरे। छोरो यत्तिकै पनि कुख्यात नै छन्। उनका ‘कर्तुत’हरु बारम्बार मिडियामा आइरहन्छन्। तेस्रो बिहे गर्दा देखाउनलाई घरनिकालासमेत गरेका थिए उनले छोरालाई। अहिले उनैलाई स्वकीय सचिव नियुक्त गरे। प्रचण्डभक्तहरुलाई लाग्ला, अनि के भो त, आफ्नै छोरालाई स्वकीय सचिव बनाउन नपाउने? पाउने हजुर पाउने। नपाउने भनेर संविधानमा लेख्या छैन। अलि नैतिकताको पनि कुरा गरौँ कि भनेको। ओली सरकारमा सहभागी सहभागी मन्त्रीहरूलाई भने आफ्ना नातेदारलाई स्वकीय र निजी सचिव राख्न नपाउने आचारसंहिता बनाएको चाहिँ बिर्सिहालेको? कि यो आचार संहिता भनेको अरु नेतालाई मात्र लाग्ने, अध्यक्ष कामरेडलाई नलाग्ने हो? आफ्नै नेता उपराष्ट्रपति नन्दकिशोर पुनका छोरा दीपेशले घोषणै गरेर म स्वकीय सचिव बन्दिनँ भनेको पनि उदाहरणका रुपमा लिनुपर्ने हो।

२) गलाभरी माला

प्रधानमन्त्री निर्वाचित भएकै दिन प्रचण्डको लाजिम्पाटस्थित निवासमा चिनियाँ राजदूत पुग्दा प्रचण्डकै सचिवालयले सार्वजनिक गरेको फोटो हो यो। फोटो हेर्ने मान्छेलाई नै अप्ठेरो लाग्ने गरी मुखै छोपिने गरी मालाले पुरिएको हेर्नुस् त। खादा पनि उत्तिकै। त्यसो त प्रचण्डको घाँटी छोटो भएकोले पनि यस्तो देखिने होला। तर माला धेरैले पुर्दैमा इज्जत धेरै हुने होइन। आफैलाई समेत अप्ठेरो पर्ने गरी यसरी मालाले पुरिनु भन्दा सहयोगीलाई भनेर माला लगाइसकेपछि फुकाल्दा राम्रो देखिने हो। विदेशतिरका नेताहरुको हाउभाउ र बडी ल्याङ्ग्वेजबाट पनि सिक्नु पर्ने हो।

३) शपथ नलिँदै निवासमा राजदूतहरुसँग भेट
चीनका मात्र होइन भारतका राजदूत रणजीत रेसित पनि प्रचण्डले लाजिम्पाटस्थित निवासमा शपथ नलिँदै भेटे। हुनत बधाई दिन लागेकाहरुलाई नआऊ भन्न मिलेन भन्ने तर्क गर्न सकिएला। तर प्रधानमन्त्रीले राजदूतहरुलाई घरमा भेट्ने होइन त्यो पनि शपथै नलिइसकेको अवस्थामा त भेट्ने नै होइन।

४) बडी ल्याङ्ग्वेजमा सतर्क भएनन्

यो फोटो सोसल मिडियामा गएको साता निकै भाइरल भयो। खासमा यो फोटो खिच्नेले कति बेला खिचेको भन्ने हिसाबमा यस्तो देखिएको हो। तर हामी नेपालीहरुलाई यस्तै विषयले छुन्छ। प्रचण्ड भारतीय राजदूतसँग झुके भन्ने हिसाबले यसको प्रचार भयो। पहिलो पटक प्रधानमन्त्री हुँदा पशुपतिमा भारतीय पूजारी हटाउने जस्तो ‘राष्ट्रवादी’ निर्णय पनि यस्तै प्रचारका सामु निस्तेज भएर लास्टमा उनले फिर्ता लिन बाध्य भएका थिए। यस्तै विषयमा कुप्रचार हुन्छ भन्ने थाहा पाएपछि यसमा सतर्क हुनु है भनेर सुझाव दिन त सकिन्छ नि। सल्लाहकारको काम त्यही त हो। यस्तो विषयमा पूर्व प्रम केपी ओलीसँग सिक्नुपर्छ। उनी भारत भ्रमणमा जाँदा मोदीसँगका केही भेट प्रत्यक्ष हेर्न पाएको थिएँ। शायद् उनलाई कसैले सुझाव दिएको थियो, या उनी आफै अलर्ट भएका हुन्। उनी आफ्नो ‘बडी ल्याङ्ग्वेज’ले यस्तो खराब सन्देश जाने केही देखिएला कि भनेर निकै नै सतर्क देखिन्थे।

५) मधेस आन्दोलनमा मारिएकालाई १० लाखको निर्णय
प्रधानमन्त्री प्रचण्डको नेतृत्वमा बनेको मन्त्रिपरिषद्को शुक्रबारको बैठकले गत वर्षको मधेस आन्दोलनमा मारिएकाका परिवारलाई राहत स्वरुप १० लाख रुपैयाँ दिने र घाइतेको उपचार खर्च सरकारले व्यहोर्ने निर्णय गर्‍यो। तर १० लाख दिने निर्णय त ओली सरकारकै पालामा भएर केहीलाई त निकासा पनि भइसकेको हो। जस्तो यो जेठ महिनामा अर्थ मन्त्रालयले गरेको रकमान्तर हेर्नुस्-

मिडियामा यस्तो सूची पनि आयो-

कसैलाई चेक गर्न मन लागे गृह मन्त्रालयले नै आर्थिक सहायता दिएको लिस्ट आफ्नो वेबसाइटमा राखेको छ, यहाँ क्लिक गरी हेर्न सक्नुहुन्छ।

त्यसो भए यो के थियो त ? जनता झुक्याउने काम कि १० लाख दिने निर्णय भइसकेकालाई फेरि १० लाख दिने निर्णय हो?

६) सचिवालयले पठाएको बायोडाटामा बुहारीको नाम छैन
प्रचण्ड प्रधानमन्त्री बने लगत्तै उनको सचिवालयले पठाएको प्रचण्डको बायोडाटामा छोरीको नाम छ। छोरोको नाम छ। तर बुहारी (हरु) को नाम छैन। न नातिको नाम नै छ। राष्ट्रपतिसँग खिचेको सामूहिक फोटोमा भने एक जना बुहारी देखिएकी छिन्। उनको हैसियत के हो? बुहारी हो कि हैन, बायोडाटामा नभएकोले थाहा भएन।

सकारात्मक काम
– यो हप्ता प्रचण्ड सरकारले गरेका सकारात्मक कामहरुमा कार्यभार ग्रहण गर्ने बित्तिकै गरेको निर्णय पर्छ-

– त्यस्तै मधेसी मोर्चासहितको संघीय गठबन्धनसँग साउन २१ गते वार्ता भयो र समस्या समाधानका लागि सकारात्मक पहल भयो। यो पनि सकारात्मक काम नै भयो। एमालेलाई विश्वासमा नलिई समस्या समाधान हुन गाह्रो हुन्छ। अहिले एमाले बिना यो काम हुन लागेकोले एमालेलाई पनि सहमत गराउने चुनौति भने छ।

– त्यसो त प्रचण्डले भन्ने र गर्ने कुरामा फरक हुन्छ। तर यो साता उद्घाटन र रिबन काट्न अल्झने छैन भनेर उनले सकारात्मक कुरा भनेका छन्।

र, यो पनि निर्णय
प्रचण्ड सरकारले यो साता गरेको एउटा निर्णय भने राजनीतिक प्रकृतिको छ- राजनीतिक आधारमा सिफारिश गरिएका राजदूतहरुको निर्णय फिर्ता लिने। केपी ओली सरकारले परराष्ट्र सेवाका ८ सहित २२ देशका लागि राजदूत सिफारिस गरेको थियो। यसमा परराष्ट्र सेवाका सिफारिशलाई कायम राखी बाँकीको भने खारेज गर्ने निर्णय गरेको हो। यसरी मुखैमा आएको राजदूत पद गुमाउनेहरु हुन्-

एमालेबाट
महेन्द्रबहादुर पाण्डे – चीन
डा. खड्ग केसी – जापान
युवराज कार्की – दक्षिण कोरिया
नारद भारद्वाज – श्रीलंका
अलिअख्तर मिकरानी – साउदी अरेबिया
डा. शिवमाया तुम्बाहाम्फे – इजरायल

एमाओवादीबाट
युवनाथ लम्साल – डेनमार्क
लक्की शेर्पा – अस्ट्रेलिया
पदम सुन्दास – बहराइन
महेन्द्र सिंह – कतार

राप्रपा नेपालबाट
निरन्जन थापा – रसिया
भरतबहादुर रायमाझी – यूएई
खगेन्द्र बस्नेत – बंगलादेश