भावी प्रधानमन्त्री पुष्पकमल दाहाल ‘प्रचण्ड’ ले भोलि हुने प्रधानमन्त्री निर्वाचनका लागि उम्मेदवारी दर्ता गराउँदा झण्डै आफ्नै पार्टीको नाम बिर्से। उम्मेदवारी दर्ता फाराम भर्दा उनले ‘प्रतिनिधित्व गर्ने राजनीतिक दलको नाममा ने.क.पा. (माओवादी लेेखेर ब्राकेट बन्द गरिसकेका थिए। पछि त्यो बन्द गरेको ब्राकेट काटेर नजिकै केन्द्र लेखेर ब्राकेट बन्द गरे।
यसअघि प्रचण्डले दुई पटक प्रधानमन्त्रीको उम्मेदवारी दर्ता गराएका थिए। दुवै पटक उनको पार्टीको नाम छुट्टाछुट्टै थियो। २०६५ सालमा उनले पहिलो पटक प्रधानमन्त्रीको उम्मेदवारी दर्ता गराउँदा उनको पार्टीको नाम थियो नेकपा (माओवादी)। ४६४ मत पाएर उनी त्यतिबेला प्रधानमन्त्री निर्वाचित पनि भए।
दोस्रो पटक २०६७ मा भएको निर्वाचनमा उनको पार्टीको नाम थियो नेकपा (एमाओवादी)। त्यतिबेला सात पटकसम्म भएको निर्वाचनमा कसैले बहुमत ल्याउन नसकेपछि उनी प्रधानमन्त्री निर्वाचित हुन पाएनन्।
यस पटक भने उनको पार्टीको नाम नेकपा (माओवादी केन्द्र) भएको छ र पहिलो र तेस्रो पार्टीको गठबन्धन भएकोले मधेसी मोर्चाले मत हाले पनि नहाले पनि बाँकी १० मत ल्याए प्रधानमन्त्री निर्वाचित हुने निश्चित छ।
