दुई नमूना समाचार हेरौँ र सिकौँ : रुद्री पत्रकारिता र अविश्वासी पत्रकारिता

यो नेपालमा खोज्न जान्नुपर्छ, रमाइला समाचार जति पनि पाइन्छ। विडम्बना चाहिँ के हो भने यी ‘रियल’ समाचारका रुपमा छापिएका हुन्, व्यङ्ग्य वा गाइजात्राका बेलामा छापिएका समाचार हैनन्।

माथिको समाचार नै हेरौँ। एउटा पर्यटन व्यवसायीको घरमा रुद्री पाठ गरेकोसमेत फोटोसहितको समाचार बनेछ पर्यटनबारे समाचार छाप्ने एउटा अनलाइन गन्तव्यनेपालन्युजमा । तर सोसल मिडियामा साह्रै उडाइएपछि अहिले त्यो समाचार हटाइएको छ। खासमा यसलाई हटाउनु पर्ने कारणै थिएन। पर्यटनसम्बन्धी जे समाचार पनि हामी हाल्छौँ, चाहे यसलाई रुद्री पत्रकारिता भने हुन्छ भनेर डिफेन्स गरे हुने हो।

गृहमन्त्रीले उद्घाटन गर्ने, कांग्रेसका नेता ताली बजाउने गरी भव्य वार्षिकोत्सव मनाउने साइट पो हो यो त। चानचुने फेसबुकमा लिङ्क राख्ने, भिडियो हेर्न क्लिक गर्नुस् लेख्ने ब्लगस्पटको साइट कहाँ हो र।

अब अर्को हेरौँ। यो चाहिँ अनलाइन होइन, छापा पत्रिका हो- गोरक्ष राष्ट्रिय दैनिक।

अविश्वास प्रस्तावमा छलफल भएर प्रधानमन्त्री केपी ओलीले राजीनामा दिएपछि मतदान आवश्यक नभएको त तपाईँहरुलाई थाहै होला। तर भोलिपल्ट यो पत्रिकाले लेख्यो – अविश्वास प्रस्ताव पारित।

अनि हुँदे नभएको मतदानको परिणाम पनि घोषणा गरिदियो- पक्षमा ३९८ र विपक्षमा २३२। पक्ष र विपक्ष जोड्ने हो भने हुन आउँछ ६३०। जबकि ६०१ सदस्यीय संसदमा हाल ५९५ सदस्य मात्रै छन्।

यसलाई भन्छन् अविश्वासी पत्रकारिता।