पोहोर भूकम्प, अहिले बाढी : कति दुःख दिएको सिन्धुपाल्चोकलाई ! पीडितहरु खोज्दैछन् कहाँ छ राज्य?

पोहोर सिन्धुपाल्चोकलाई भूकम्पले सतायो। घरहरु अझै भत्किएकै अवस्थामा छ। यसपालि फेरि बाढीले सताएको छ उही सिन्धुपाल्चोकलाई। गएको २१ गते चीनमा भूकम्पका कारण पहिरो गएर भोटेकोशी नदी थुनिएको थियो करिब १५ मिनेट जति। चीनले त्यसबारे कुनै सूचना नेपाललाई दिएन। बिना सूचना एक्कासी त्यो खुलेपछि नदीमा ठूलो बाढी आयो र नेपालतर्फ धेरै क्षति गर्‍यो। अहिलेसम्म लिपिंगमा २१ घर र तातोपानीमा २० घर तथा कोदारीमा ५ घर र एक निजी विद्यालय बगाएको छ। एभिन्युज टेलिभिजनमा कार्यरत शुभक महतोले बाढी पीडित ठाउँको स्थलगत रिपोर्टिङ गरेर फर्किएका छन्। उनका अनुसार बाढी आएको तीन दिन बितिसक्दा पनि त्यहाँ राज्यको उपस्थिति देखिएको छैन। हेर्नुस् शुभकले खिचेका केही फोटो।

तातोपानी भन्सार कार्यालयको गोदाम, पार्किंग र क्यान्टीन बगाएको छ भने इलाका प्रहरी कार्यालय तातोपानीको आधा भन्दा बढी भाग बगाइसकेको छ। माथिल्लो भोटेकोशीको ड्याम पूर्ण रुपमा ध्वस्त भएको छ। लार्चामा ठूलो पहिरो गइरहेको छ।

लार्चादेखि माथि करिब ५/६ किलोमिटरको भाग तातोपानी, कोदारी र लिपिंगको अवस्था भूकम्पभन्दा पनि अहिले खराब रहेको छ।

सिन्धुपाल्चोकको लिपिङ बजार

लिपिङ बजारमा रहेको बस पार्क र त्योसंगै गरेको घरहरु भोटेकोशी नदीले कटान गरिसकेको।

चीनको कस्टम अफिस पनि कटानको जोखिममा

सशस्त्र प्रहरी सीमा सुरक्षा बल तथा तातोपानी भन्सार कार्यालय अगाडि आएको पहिरो।

कटानमा परेको तातोपानी भन्सार कार्यालय र भन्सार कार्यालयको गोदाम र क्यान्टिन भोटेकोशीले बगाइसकेको छ।

चीन र नेपाल जोड्ने मितेरी पुलसमेत कटानमा परेको छ।