उफ्, फेरि बन्द ! कहिले बन्द हुन्छ यो बन्द ?

लामो समयपछि फेरि नेपाल बन्दको मार जनताले खेप्नु परेको छ। भूकम्प र त्यसलगत्तै केही महिनासम्म नाकाबन्दीको मार खेपेको नेपालीलाई आजको बन्द ‘उपहार’ दिएका हुन् माओवादीबाट टुक्रेर वैद्य माओवादीमा गएर त्यो वैद्य माओवादीको एक भाग वैद्यलाई छाडेर पुरानै माओवादीमा मिसिनुअघि नै अलग भएको विप्लव माओवादीले। अर्थात् नेत्रविक्रम चन्द ‘विप्लव’ नेतृत्वको माओवादी। जो प्रचण्डको नेतृत्वको जनयुद्धमा केही हजार मरे, मेरो नेतृत्वमा केही हजार मर्छन् त के फरक पर्छ भन्ने खालका मान्छे हुन् रे भन्छन्। प्रचण्ड नेतृत्वको जनयुद्धले केही भएन, धोका दिए, अब नयाँ जनयुद्ध सुरु गर्नुपर्छ भन्ने मान्छे हुन् उनी। अहिलेको बन्द भने देशभर पक्राउ परेका आफ्ना कार्यकर्ताहरुलाई छाड्नु पर्ने मागसहितको बन्द हो। मान्छे हाम्रो नाममा तर्सन्छन् कि तर्सँदैनन् भन्ने टेस्ट पनि हुनसक्छ आजको यो बन्द।

काठमाडौँमा बन्द नभएको धेरै भइसकेको थियो। राजतन्त्र फर्काउनु पर्ने माग गरेर उपत्यका बन्द आह्वान गरेको नराम्रोसँग फेल खाएको थियो। यातायात व्यवसायीहरुको चक्काजाममा निजी गाडी चल्न दिइएको थियो। तर विप्लव माओवादीले भने तर्साएरै बन्द गरिदिए। देखिने प्रचारभन्दा हल्ला नै धेरै भएको थियो बन्दको। बन्द गराउन उत्रनेहरु सडकमा नदेखिए पनि गाडी भने कम गुडेपछि बन्द आह्वान गर्नेहरु दङ्ग पर्ने नै भए। भरे विज्ञप्तिमा बन्द सफल गराउने महान् जनतालाई धन्यवाद पनि दिने होलान्।

तर्साउनलाई बिहानै एक श्रमजीवी ट्याक्सी चालकको ट्याक्सीमा आगो झोसी पनि हाले। पक्राउ परेकाहरुलाई पनि केही दिनमा छाड्ने नै होला। यो बन्दले विप्लव माओवादीलाई अझै बन्द गर्न उक्साउने मात्रै होला। जनता बन्ददेखि दिक्क भयौँ भन्छन् तर बन्ददेखि तर्सेर बन्दलाई साथ दिइ नै रहन्छन्। बहाना पनि हुन्छ- सुरक्षा व्यवस्था चुस्त भएको भए बन्दमा निस्कन्थ्यौँ।

सरकारले बजेटमा बन्दमा भएको क्षतिपूर्ति आयोजकबाट भराउने घोषणा गरेको छ- कार्यान्व्यन कसरी हुन्छ हेरौँ-

जाँदाजाँदै विप्लवबारे यो तीन वर्ष अगाडिको ब्लग पनि हेरौँ
विप्लवको कोठामा के देखियो गाँठे ! माओ र माइलीको फ्युजन