प्रचण्डले पनि ओलीसँग गफ दिन सिकेछन्- भूकम्पपीडितलाई ५ लाख दिन्छु रे

प्रधानमन्त्री केपी ओलीसँग धेरै मान्छेको धेरै थरिका आशा छन्। कसैको आशा नाकचुच्चे रेल चढ्नेमा छ। कसैको एक वर्षभित्र (एक वर्ष पुग्न लागेपछि संशोधन गरेर दुई वर्ष बनाइएको) लोडसेडिङ अन्त्य हुनुमा छ। कसैको पाइपबाट आएको ग्यास बाल्ने छ भने कसैको नेपाली झण्डा भएको पानीजहाज चढ्नेमा। आश्वासन बाँडेरै प्रधानमन्त्री ओली दिन दुगुना रात चौगुना ‘हिट’ भइरहेको देखेर होला अघिल्लो संविधानसभाको सबैभन्दा ठूलो दलका नेता तथा पूर्व प्रधानमन्त्री प्रचण्डले पनि ओलीको सिको गर्न थालेछन्।

आज दोलखाको चरिकोटमा आयोजित एक कार्यक्रममा उनले घोषणा गरिदिए- बाइ दि वे म प्रधानमन्त्री भइहालेँ भने सरकारले दिएको ३ लाख निर्ब्याजी ऋणलाई अनुदानमा परिणत गर्छु। त्यतिमात्र हो र, उनले थप दुई लाख पनि दिने रे। भनेको कूल ५ लाख रुपैयाँ।

के गर्ने त अनि, ओलीले वृद्ध भत्ता बढाएर अर्थशास्त्रीहरुको गाली खाए पनि जनताले गजब भनिहाले। जे भाषण गरे पनि जमेकै छन्। जनता उनको आश्वासनमा लट्ठ परेकै छन्। अनि प्रचण्डलाई पनि सहिनसक्नु भएन होला त, बाँकी एउटा भूकम्पपीडितको इस्यु छ- ठोक्दिम् यही भन्दै म प्रधानमन्त्री भए ५ लाख दिन्छु भन्दिए।

अब केही दिन उनले यस्तै आश्वासनका भाषणहरु गर्न थाले हुन्छ- म प्रधानमन्त्री भए आफ्नै स्याटेलाइट प्रक्षेपण गर्छु, रकेट चन्द्रमामा पुर्‍याउँछु, सगरमाथामा सुरुङ खनेर चीनसम्म रेलको बाटो बनाउँछु, हावाबाट मात्र होइन, परमाणु ऊर्जाबाट विद्युत निकाल्छु…..

बरु छिटो गरे हुन्छ- नत्र सबै ओलीले नै भ्याइदेलान्। आखिर, दिएको आश्वासन पूरा गर्नुपर्ने होइन क्यारे, प्रधानमन्त्रीले गरेका छैनन् तपाईँ उधारो प्रधानमन्त्रीले किन गर्नपर्नु। एक पल्ट मुखसम्मै आइसकेको प्रधानमन्त्री गुमाइहाले अब उनलाई प्रधानमन्त्री कसैले बन्न दिने हैनन् क्यारे, बाँड्नुस् प्रचण्ड जी बाँड्नुस् आश्वासन। आश्वासनमा सरकारले ट्याक्स लगाएको छैन। जति बाँडे पनि हुन्छ आश्वासन।