कांग्रेस महाधिवेशनको चुनाव नौटंकी सफलताका साथ दोस्रो हप्तामा प्रवेश

भूइँभरी देखिएका यी कागजै कागज खासमा कांग्रेसको १३ औँ महाधिवेशनका उम्मेदवारहरुको प्रचार सामाग्री हुन्। भित्ता नरङ्ग्याउने राम्रो निर्णय गरे पनि उम्मेदवारहरुले कागजबाट भूइँ भने राम्रैसँग रङ्ग्याए। ठ्याक्कै एक हप्ताअगाडिको फोटो हो यो अर्थात् पछिल्लो आइतबारको। त्यो दिन मतदान भएको थियो। आज अर्को आइतबार भइसक्यो। तर अझै मतगणना सकिसकेको छैन। जम्मा पद ६४ अनि उम्मेदवार ३१२। सबभन्दा बढी झ्याउ भइरहेको छ खुला २५ केन्द्रीय सदस्यको मतगणना। ९० जना उम्मेदवार भएको यसको मत गन्न थालेको आज पाँचौँ दिन हो।

किन त ?

धेरै उम्मेदवार अनि उनीहरुबीच विश्वासको कमिका कारण मतगणना प्रक्रिया लम्बिएको हो।

९०-९० उम्मेदवार छन्। २०/२५ भोट मात्र ल्याउनेहरुको पनि चुरिफुरी बेग्लै। धाँधली होला भनी कराउनेहरु उनीहरु र उनीहरुका प्रतिनिधिहरु नै। फेरि एक दुई भोटको अन्तरले हारजित हुने हुँदा धेरै मत ल्याउने उम्मेदवारहरुलाई पनि चनाखो हुनुपर्ने नै। चरम अविश्वास।

त्यसैले सबैको चित्त बुझ्ने गरी एउटा उपाय अपनाइयो- प्रोजेक्टर। मतपत्र भूइँमा राखेर औँलाले देखाई देखाई गन्ने र त्यसलाई क्यामेराले खिचेर भित्तामा प्रोजेक्टरमार्फत् देखाउने। अनि गन्न पनि तीन चार ठाउँमा गनेको भए छिटो नतिजा आउँथ्यो। एक ठाउँमा मात्रै गन्न थाले।

यसरी मत गन्दा एउटा मत गन्नै ५ मिनेट लाग्यो। दिनमा २५० जति मात्र गन्न सकियो। त्यसपछि चौथो दिन शनिबार बल्ल यस्तो तालले हुन्न भन्दै प्रोजेक्टर स्रोजेक्टर अफ गरेर दुई ठाउँमा गन्न थाले। त्यही भएर शनिबार डबलभन्दा बढी मत गनियो। हिजोसम्मको स्थिति यस्तो थियो-

यसरी दोस्रो हप्तासम्म सफलताका साथ मञ्चन भइरहेको छ- मतगणना नौटंकी।