इलेक्ट्रिक हैन, दाउराकै चितामा हुने भएछ कोइरालाको अन्त्येष्टि

बिहान १२ बजेर ५० मिनेटमा पूर्व प्रधानमन्त्री सुशील कोइरालाको निधन भयो। अप्रत्याशित यो खबर बिहान ४ नबज्दासम्म धेरैले थाहै पाएनन्।
बिहान ८ बजेपछि कोइरालाको पार्थिव शरीरलाई नेपाल प्रहरीको ट्रकमा राखेर पार्टी कार्यालय सानेपा लगियो।
सानेपामा ११ बजे पार्टी केन्द्रीय समितिको बैठक बस्यो।
त्यसपछि महेश आचार्यले सञ्चारकर्मीहरुलाई भनेका थिए, ‘परिवारको अनुमतिमा उहाँको विद्युतीय शव दाह गर्ने निर्णय भएको छ।’
धेरैले यसलाई राम्रो कदम माने। माघ १० गते मात्रै उद्‍घाटन भएको विद्युतीय शव दाह गृहको प्रचार र यसलाई सामाजिक मान्यता दिलाउनेतर्फ एउटा पाइला हुनसक्थ्यो यदि पहिलो हाइप्रोफाइल व्यक्तिका रुपमा कोइरालाको अन्त्येष्टि भएको भए। तर…

तर राति सरकारी समाचार एजेन्सी राससको समाचारमा परिवारले नमानेको खबर पो आयो। सुशीलका भाइ अशोक कोइरालालाई उद्‍धृत गर्दै समाचारमा लेखिएको रहेछ- ‘परिवारजनको इच्छाअनुसार हिन्दू परम्पराअनुसार नै दाहसंस्कार गरिनेछ।’

विद्युतीय शव दाह गरिएको भए पनि हिन्दू परम्परा त कायम हुने नै थियो। दागबत्ती लगायतका सम्पूर्ण प्रक्रिया पूरा गरी जलाउनका लागि मात्र दाउराको चितामा नराखी यस्तो इलेक्ट्रिक चिताभित्र पठाइन्थ्यो।

तर अब परिवारले नै नमानेपछि जबर्जस्ती गर्ने कुरा त आएन। परिवारको इच्छाविपरीत जान मिल्ने कुरा पनि भएन।

तपाईँलाई के लाग्छ त, के तपाईँ चाहिँ आफ्नो मृत्यु भएपछि वा तपाईँको आफन्तलाई संभव भए इलेक्ट्रिक चितामा जलाउन तयार हुनुहुन्छ? आफ्नो प्रतिक्रिया तल कमेन्ट बाकसमा दिनुस् वा भोट गर्नुस्-