लु लाग्ने खाडी देशमा अहिले हिउँ पो परिरहेको छ

-गगन नेपाली-

अरब भन्ने बित्तिकै तपाईँको दिमागमा प्रचण्ड गर्मी र मरुभूमिको चित्र आउन सक्छ। हुन पनि गर्मीमा यहाँ आफ्नै छायाँ पनि देखिन्न। घाम ठीक तपाईँको टाउको माथि रहेको हुन्छ। बजारका केही पसलमा ढोका खुल्दा चराहरु एसीको चिसो पाउन भित्र पस्ने प्रयास गर्छन्। गर्मी मौसममा काम गर्दागर्दै लु लागेर कामदारहरु ढल्ने यही खाडीका देशहरुमा गत हप्तादेखि देख्ने र भोग्ने बाहेकका लागि पत्याउनै नसक्ने मौसम बनेको छ। हो, अरबमा यसपालि हिउँ परेको छ। सगरमाथाका छोराहरुले अरबमा हिउँ खेलेका छन्।

साउदी अरेबियाको अरर, तुरैफ क्षेत्रहरु जुन जोर्डान, इराकको सिमाना नजिक रहेका छन् ती क्षेत्रहरुमा गत हप्ता हिमपात भएको छ। गर्मी मौसममा अत्याधिक गर्मीले जसरी हिँडडुल गर्न गाह्रो हुन्छ, त्यस्तै यस जाडो मौसममा पनि समुद्रबाट बहने चिसो हावाका कारणले सूर्यास्तपछि निकै नै चिसो हुनाले बाहिर हिँड्न असहज महसूस हुन्छ।

प्राय समय गर्मी रहने खाडी मुलुकमा यही जाडोको समयमा नै असामान्य कुराहरु अनुभव गर्न सकिन्छ, जस्तो पानी पर्ने, मच्छर लाग्ने, झिंगा लाग्ने आदि कुराहरु यहाँ जाडो महिनामा नै हुने गर्छ। कुवेतमा यो हप्ता तापक्रम शुन्य डिग्री सेल्सियससम्म पुगेको छ। सामान्यतया सूर्योदयअघि यहाँको मौसम सून्यदेखि सात डिग्री सेल्सियसमा रही आएको छ।

निर्माण क्षेत्रमा कार्यरत कैयन् नेपालीलाई गर्मीबाट राहत मिले ता पनि यो जाडोबाट चाही आहत पुगिरहेको छ। साउदी अरेबियाको अररमा हिमपातको बेला खिचिएका माथिका केही फोटोहरु गोविन्द शाक्यबाट साभार गरिएका हुन्।