हे राम, फेसबुकको हल्लालाई पत्याउँदै समाचारै लेखेछन् पो!

फेसबुकको एउटा पोस्ट सेयर गरेवापत् ४५ लाख डलर पुरस्कार पाउने रे भनी चलेको हल्ला गलत भएको बारे अस्ति नै ब्लग लेखिसकेको थिएँ। यहाँ क्लिक गरी हेर्नुस्। तर पनि यो हल्ला फैलन कम भएको छैन। हुँदाहुँदा आर्थिकन्युज नामको अनलाइनले त यसलाई पत्याएर समाचारसमेत लेखी पाठकहरुलाई झुक्याएको छ।

‘फेसबुक पोष्ट शेयर गरेबापत ४.५ मिलियन डलर पाउने’ शीर्षकको समाचारमा ‘आफ्नो उक्त पोष्ट शेयर गरेबापत हजार जना भाग्यशाली प्रयोगकर्तालाई ४.५ मिलियन डलर दिइने जुकेरबर्गले आफ्नो पोष्टमा समेत जानकारी गराएको छ’ भन्ने बिल्कुलै गलत कुरा त्यसमा लेखिएको छ। जुकरवर्गले अहिलेसम्म यस्तो स्टायटस लेखेका छैनन्। समाचार लेख्नेले आफ्नो मनमा आएका कुरा लेख्दैमा समाचार सही हुँदैन।

अरु पनि केही अनलाइनले यही हावा कुरालाई समाचारको रुप दिएका छन्-

यही हावा कुरालाई पत्याउँदै स्टायटस कपिपेस्ट गर्ने थप केही चर्चित मान्छे पनि भेटिएका छन्। अमेरिकाको ह्वाइट हिमाल टेलिभिजनमा सम्प्रेषण नामको कार्यक्रम चलाउने पत्रकार शैलेश श्रेष्ठले पनि २० डिसेम्बरमा यो स्टायटस कपिपेस्ट गरेका छन्

पढ्ने बित्तिकै थाहा हुन्छ यो हावा, हचुवा कुरा हो। यसलाई पत्याउने कुनै पनि आधार छैन। हो, मार्क जुकरबर्गले आफ्नी छोरी जन्मेको दिन फेसबुकको अधिकांश सेयर च्यारिटीलाई दिने भनेका हुन्। तर त्यो पनि अरुलाई होइन, आफ्नै नाममा खुल्ने लिमिटेड लायबल कम्पनी (LLC) को नाममा सार्ने भनेका हुन्। त्यसो भन्नु एउटा गोजीबाट पैसा निकालेर अर्को गोजीमा राखे बराबरै हो।

यो हचुवा स्टायटसमा चाहिँ १० प्रतिशत सेयर चैँ तपाईँ र म जस्तै सर्वसाधारणलाई दिने योजना छ भनिएको रहेछ। अनि त्यसका लागि तपाईँले गर्नुपर्ने काम चाहिँ यही मेसेजलाई कपि गरेर पेस्ट गर्नुपर्ने रे तुरुन्तै। अनि फेसबुकले दिनको लास्टमा सबै सर्च गरेर हजार जनालाई ४५ लाख डलर दिने रे।

हाहाहा, ४५ लाख डलर कमाउन यति सजिलो हुन्छ र। अनि मार्क जुकरबर्गलाई के खाँचो र ४५ लाख डलर अरुलाई बाँड्न। जसले कुनै एक सामान्य व्यक्तिको फेसबुकको लाइक बढाउन त रकम धुतिरहेको छ, उसले सित्तैमा अरुलाई डलर बाँड्छ? केको खाँचो परेको छ र बाँड्न? बाँड्नै परे पनि उसले कुनै च्यारिटीलाई बाँड्छ नि तपाईँलाई थोरै बाँड्छ!

लौ तपाईँलाई विश्वास लागेन रे, जुकरवर्गले बाँड्छ नै भन्ने लाग्यो रे। त्यसो हो भने जुकरवर्गकै फेसबुक पोस्टमा गएर हेरे भो नि, यस्तो महत्त्वपूर्ण घोषणा त उनले पक्कै गर्नुपर्ने हो। हेर्नुस् यहाँ क्लिक गरेर।

देख्नुभो त यो बारे लेखेको? भए पो देख्नु।

चार विषय जुन तपाईँले बुझ्नै पर्छ-

१) पैसा कमाउन सजिलो छैन। मेहनतले कमाएको पैसा कसैले सित्तैमा जो पायो त्यहीलाई बाँड्दै हिँड्दैन।
२) मार्क जुकरबर्गलाई पैसा बढी भएको छैन।
३) सामान्य कपिपेस्ट गरेको भरमा लाखौँ डलर त तपाईँले सपनामा पनि पाउनु हुन्न, विपनाको कुरै छाडौँ।
४) तपाईँले यो हचुवा पोस्ट सेयर गरेर कसैलाई केही फाइदा हुनेवाला छैन। यसले त झन् फेसबुक भनेको हावा कुरा, हल्ला फैलाउने ठाउँ हो भनी देखाउन सघाउँछ।