अन्नपूर्णको अहंकारी शैली : पद्मरत्न र तुलानारायणसित माफी पनि नमागी भन्यो- भूलवश उद्‍धृत गरेको समाचार सच्याउँछौँ

‘पद्मरत्न तुलाधरले भारतले पूर्ण रुपमा नाकाबन्दी लगाउनु पर्ने र नेपालमा केही पनि छिर्न दिन नहुने भनेको र तुलानारायण साहले केरुङमा समेत नाकाबन्दी गर्ने धम्की दिएको’सनसनीपूर्ण समाचार छापेको अन्नपूर्ण पोस्टले गल्ती स्वीकारेको छ। शनिबारको पहिलो पेजमा छापिएको खण्डन/स्पष्टीकरणमा अन्नपूर्णका सम्पादकले गल्ती स्वीकारेका हुन्। तर गल्ती स्वीकार्दा पनि अन्नपूर्णले अहंकारी शैली देखाएको छ। आफ्नो कुरा माथि पार्न उसले यथार्थमा ती अभिव्यक्ति ‘एक जनजाति नेताको’ भएको बताएको छ। तर कुन जनजाति नेता हो खुलाउन सकेको छैन। त्यसबाहेक आफ्नै समाचारका कारण दिनभर अन्य अनलाइन र सोसल मिडियामा गाली वर्षेर चरित्र हत्या भए पनि माफीको एक शब्द पनि अन्नपूर्णका सम्पादकले व्यक्त गरेका छैनन्। गलत समाचारका कारण पर्न गएको दुःखप्रति क्षमासमेत मागेको छैन। उल्टो पद्मरत्न तुलाधरप्रति नै बायस भएर २०४५ सालको नाकाबन्दीसँग जोडेर फेरि पनि चरित्र हत्या गर्न खोजेको छ।

यस्तो छ अन्नपूर्णले समाचार सच्याएको शैली

यस्तो थियो समाचार (ठूलो गरी पढ्न फोटोमा क्लिक गर्नुस्)

पद्मरत्नप्रति कतिसम्म बायस छ अन्नपूर्ण भने तुलानारायण साहको खण्डन नै छापेको छ उसले तर उसैगरी अन्नपूर्णबाट गलत रुपमा लाञ्छित गरिएका पद्मरत्नले निकालेको यो वक्तव्यलाई भने कुनै ठाउँ दिइएको छैन।

बोल्दै नबोलेका मान्छेलाई यस्तो यस्तो बोल्यो भन्दै समाचार छापेर गर्नुसम्म चरित्र हत्या गरेर खण्डन पनि नछाप्नुबाट नै नियत प्रष्ट हुन्छ। त्यसबाहेक यो गलत समाचारलाई दर्जनौँ अनलाइनहरुले साभार गरेका थिए। उनीहरुले भने मूल स्रोतले समाचार सच्याउँदा पनि आफूले सच्याउन आवश्यक ठानेका छैनन्।

त्यस्तै गलत समाचारलाई विश्वास गरेर सोसल मिडियामा गाली वर्षाउनेहरुले पनि आफ्नो अभिव्यक्तिलाई सच्याउन आवश्यक ठानेका छैनन्।

अन्नपूर्णले समाचार सच्याउने नाममा झारा टार्ने शब्द लेखे पनि उसले यी प्रश्नको जवाफ दिनु आवश्यक छ-

– वास्तवमा ती अभिव्यक्ति कुन जनजाति नेताको थियो? पहिले नाम किटेर गलत व्यक्तिहरुको नाम लिएपछि अब नाम उल्लेख गर्नुपर्छ कि पर्दैन? नेता जनजाति हो भनेर चिनिएपछि नाम उल्लेख गर्न किन कठिनाइ ?

– नेपालमा एउटा पनि सामान छिर्न नदिनु भनी भारतीय राजदूतसँग याचना गरेको भनी समाचार छापेर चरित्र हत्या गरेपछि र त्यो समाचार गलत रहेको भनी आफैले सच्याइसकेपछि सम्बन्धित व्यक्तिलाई परेको दुःखबारे क्षमा याचना गर्नुपर्छ कि पर्दैन ?

-समाचारमा दुई व्यक्तिको उल्लेख गरिएकोमा एकको मात्रै खण्डन किन छापियो? दुई जनाकै खण्डन किन छापिएन ?

– स्पष्टीकरणमा समेत पद्मरत्न तुलाधर मौन रहेको स्वीकार गरिएको छ। तर अघिल्लो दिन नभएको कुरा बोल्यो भनेर समाचार छाप्ने पत्रिकाले अर्को दिन मौन रहेको भन्दै स्पष्टीकरणमा समेत आलोचना किन गर्‍यो?

-अनलाइन संस्करणमा छापिएको यही समाचार (भारतीय दूतसँग पद्‍मरत्‍नको याचना, ‘एउटा पनि समान छिर्न दिनु भएन’) लाई अझैसम्म किन सच्याइएको छैन? आजको पत्रिका नपढ्ने र त्यो लिङ्कमा सीधै गएका पाठकले कसरी थाहा पाउँछन् यो समाचार गलत हो भनेर? गलत समाचार भनेर सम्पादकले नै स्वीकारिसकेपछि अनलाइनमा पनि त्यसलाई सच्याउनु पर्दैन? गलत समाचार नै प्रवाह गरिरहन मिल्छ?

यो पनि पढ्नुस्
हेल्थ बिटका रिपोर्टरले लेखेको पोलिटिकल न्युजबाट उठेको तरङ्ग, आखिर भएको के थियो?