आधा दर्जन उपप्रधानमन्त्री भएको ऐतिहासिक मन्त्रिमण्डलको शपथ ग्रहण फोटोमा हेर्नुस्

आज ७ जना मन्त्रीले शपथ लिँदा ३ जना त उपप्रधानमन्त्री नै थिए। यसअघि नै ओली मन्त्रिमण्डलमा ३ जना उपप्रधानमन्त्री भइसकेका थिए। नेपालको इतिहासमा नै पहिलो पटक आधा दर्जन उपप्रम बनाएर ओली मन्त्रिमण्डलले राष्ट्रिय कीर्तिमान कायम गरिसकेको छ। थोरै ‘मन्त्रिमण्डल’ शब्दबारे पनि भनिहालौँ है। खासमा राजाको पालामा मात्र मन्त्रिमण्डल भन्ने गरिन्थ्यो। पछि मन्त्रिपरिषद् भन्ने गरिएको थियो। संविधानमा पनि मन्त्रिपरिषद् नै भनिएको छ। तर यसपालि राजाकै पालामा मन्त्री भएकाहरु पनि मन्त्री भएकोले होला सबैजसो मिडियाले मन्त्रिमण्डल नै लेख्न थालेको भन्ने जोक सुनिन्छ। यो ऐतिहासिक मन्त्रिमण्डलको शपथ ग्रहण हेरौँ न अ‍ंगद ढकालले खिचेका फोटोमा।

शपथ ग्रहण ४ बजे राष्ट्रपति कार्यालयमा गर्ने भनिएको थियो। तर मन्त्री बन्ने को निश्चितै भएको थिएन। यस्तो बिजोग। हुँदाहुँदा एमालेमा मन्त्री बनाउन भनेर नाम ठीक्क पारिएका अष्टलक्ष्मी शाक्यले मन्त्री बन्दिनँ भनिदिइन्। पार्टीमा आफूभन्दा कम वरियताका भीम रावलललाई उपप्रधानमन्त्री बनाएपछि पहिलो राष्ट्रपति निर्वाचनमा एमालेले उपराष्ट्रपतिका उम्मेदवारका रुपमा अगाडि सारिएकी शाक्यले कति मैले मात्र मन्त्री खानु खान्न भनिदिइन्। ओली ट्वाँ। हतार हतार शान्ता मानवीलाई मन्त्री बनाउने निर्णय गरियो। यो हतारोको निर्णय पुरुष मन्त्रीको हकमा भइदिएको भए नयाँ दौरा सुरुवाल नभएकोले त्यसको जोहो गर्ने क्रममा शपथ छुट्न सक्थ्यो।

फोटोमा ठीक ट्याममा शपथ होला भन्ठानेर कार्यक्रम स्थलमा आइपुगेका सभामुख ओनसरी घर्ती र कार्यवाहक प्रधानन्यायाधीश गिरिशचन्द्र लाल।

बल्ल दुई मन्त्री आइपुगे। ए, सरी मन्त्री हैन उपप्रधानमन्त्री पो त दुवै। एक जना उनकै भनाईमा भूतले खाजा खाने समयमा मन्त्री भएका स‍ंघीयताविरोधी नेताको छवि बनाएका चित्रबहादुर केसी। अनि अर्का मालेका सिपी मैनाली। केसीले पाएका छन् सहकारी तथा गरिबी निवारण मन्त्रालय। सिपी मैनालीले भने महिला तथा बालबालिका मन्त्रालय पाएका छन्। अघिल्लो मन्त्रिपरिषद्‌मा यो मन्त्रालय उनकै पत्नी निलम केसी मन्त्री थिइन्।

तेस्रो मन्त्री पनि आइपुगे- शेरधन राई। यिनलाई सूचना तथा सञ्चार प्रविधि मन्त्रालय दिइएको छ। फोनमा कुरा गर्दै बधाई स्वीकार्दै होलान्। अशोक राईहरु त्यतिबेला जनजाति शक्ति बनाउन पार्टी फुटाएर हिँडेका बेला एमाले बचाएका व्यक्ति हुन् यी। अहिले अशोक राईहरु उपेन्द्र यादवसँग एकता गरेर मधेस आन्दोलन गर्दैछन्, यिनले मन्त्री पुरस्कार पाए।

अब भए चार जना मन्त्री।  दुई जना उपप्रम दुई जना मन्त्री।

ल अब अरु पनि मन्त्री थपिए है।

छ जना पुरुष मन्त्रीको समूह तयार। तीन मन्त्री आनन्द पोखरेल (पर्यटन तथा नागरिक उड्डयन), शेरधन राई (सञ्चार), विष्णु पौडेल (अर्थ) र तीन उपप्रम भीम रावल (रक्षा), सिपी मैनाली र चित्रबहादुर केसी

ल महिला मन्त्री पनि आइपुग्नु भो है। हात मिलाउँदै शान्ता मानवी।

छेउकी एक जना चाहिँ मन्त्री हैनन् है। कहाँबाट मन्त्री बस्ने ठाउँमा आएर बसिदिइछिन्। यसो रोक्ने पनि कोही भएनन्।

ल विशिष्टहरु आइपुग्नुभो। कार्यवाहक प्रधानन्यायाधीश, उपराष्ट्रपति, प्रधानमन्त्री र सभामुख। राष्ट्रपतिको प्रतीक्षा हुँदै।

राष्ट्रपति ज्यु आउनु भो, सबैले नमस्कार गर्नुभो।

बज्यो राष्ट्रगान।

अब धमाधम शपथ।

सप्पै कम्युनिस्टहरु, सप्पैले ईश्वर नभनी देश र जनताको नाममा मात्र शपथ खाएछन्।