मोर्चाको प्रस्ताव : तिमी मलाई ज्यान देऊ, म तिमीलाई ५० लाख दिन्छु

भारतीय स्वतन्त्रता स‍ं‌ग्रामका नेता सुभाषचन्द्र बोसको भनाई थियो- तिमी मलाई रगत देऊ, म तिमीलाई स्वतन्त्रता दिन्छु। सीमाङ्कनको विरोधमा आन्दोलनरत संयुक्त लोकतान्त्रिक मधेसी मोर्चाको बुधबार काठमाडौँमा बसेको बैठकले यही शैलिको निर्णय गर्‍यो : तिमी मलाई ज्यान देऊ, म तिमीलाई ५० लाख रुपैयाँ दिन्छु। साथमा बोनस शहिद परिवारलाई निःशुल्क शिक्षा र रोजगारीको जिम्मेवारी रे। आन्दोलनमा मान्छे मर्न उत्प्रेरित गरेको भन्दै कडा आलोचना भएको यो निर्णयमा हस्ताक्षर गर्ने दलका नेताहरु हुन्- उपेन्द्र यादव, अध्यक्ष– संघीय समाजवादी फोरम, नेपाल, महन्थ ठाकुर, अध्यक्ष– तराई–मधेश लोकतान्त्रिक पार्टी,राजेन्द्र महतो, अध्यक्ष– सद्भावना पार्टी र रामनरेश राय, वरिष्ठ नेता– तराई–मधेश सद्भावना पार्टी, नेपाल। साउन ३१ र ३२ गते वैद्य माओवादीसहितको मोर्चाले गरेको दुई दिने आम हड्ताल लगत्तै यी दलहरुले अनिश्चितकालीन मधेस बन्द गरिरहेका छन्। पछिल्ला दिनहरुमा सप्तरीको भारदह, कपिलवस्तुको तौलिहवा र जनकपुरमा हि‌ंसात्मक प्रदर्शन भएका छन्। भारदहमा ३५ वर्षीय राजीव राउतको गोली लागी मृत्यु भयो। अरु ठाउँमा पनि गोली लागी प्रदर्शनकारी घाइते भएका छन्।

मान्छे मर्दा थामथुम पार्न अहिलेको स्टान्डर्ड रेट हो १० लाख। त्यसमा पाँच गुणा थपेर ५० लाख दिने भनी सोझासाझा जनताको लाशमाथि चढेर प्रदेशको मुख्यमन्त्री बन्न खोज्ने प्रयास यो हो। यी मरेकाहरुलाई ५० लाख आन्दोलनपछि बन्ने प्रदेश सरकारले दिने भनिएको छ। मतलब उनीहरुले भने अनुसार संघीयता आएर त्यसमा चुनाव भएर यी दलकै सरकार बन्नुपर्‍यो। तब बल्ल यो ५० लाख दिने निर्णय हुन्छ। अझै कति वर्ष लाग्छ यो हुन। उधारो रकमको लोभ देखाएर मान्छेलाई मर्न प्रेरित गर्ने यो निर्णयको सिके राउतले समेत विरोध गरेका छन्। उनले लेखेका छन्- मधेश आन्दोलनको ५४ जना मधेशी शहिदको परिवारलाई मधेशी नेता कति चोटि हेर्न गए ? मधेश आन्दोलनमा गोली लागेर घायल भएकालाई कति चोटि हाइ-हेलो पनि भने ? अस्ति भर्खर सिमरौनगढमा शहीद भएका जय नारायण पटेलको परिवारलाई त सम्झौता गराएर अहिले सम्म १० लाख दिलाउन सकेको छैन, अनि ती मधेशी नेताहरूले अब मधेशीलाई मारे पछि ५० लाख दिने रे ! पक्कै दिन्छ होला, विश्वास गर्नुस् है त ! जसरी ५४ जनालाई मारेर २२ बूँदे, ८ बूँदे का नाममा ५६ मंत्रालय हात लगाए, आफ्नो पत्नी, समधी, प्रेमिका र व्यापारीहरूलाई सभासद् बनाए, त्यसरी नै ।

उनले थप लेखेका छन्- ५० लाख मू्ल्यमा मधेशीलाई आफ्नो छोरा-छोरी मर्न लगाउन सौदा गर्ने नेता महाशय, तपाईं आफ्नो छोरा-छोरीलाई मर्न लगाउनुस्, जनही १-१ रुपैयां जम्मा गरेर भए पनि मधेशी जनताले तपाईंलाई ५१ लाख दिने बचन दिन्छ। अलिकति पनि तपाईंसंग विश्वास गर्ने आधार छ भने जनताको यो चुनौती स्वीकार गर्नुस्, न भए यसको सीधा मतलब आफ्नो छोराछोरीलाई ऐयासी गराउने र निमुखा जनताको छोरा मार्ने तपाईंको पाखण्डी चाल मात्र हो भनेर जनताले बुझ्नुपर्ने हुन्छ। तपाईंको छोरा छोरा हो, अरूको छोरा तपाईंको खिलौना ? मधेश आन्दोलनका ५४ शहिदहरूलाई बेचेर त्यसको पैसाले आफ्नो छोरा-छोरीलाई अमेरिका र रुसमा ऐयाशी गराउँदै हुनुहन्छ, र अब फेरि निमुखा मधेशीहरूको छोरा-छोरीलाई मर्न लगाएर भजाउने दाऊ !?

सीमाङ्कनको असन्तुष्टिले तराईका लगभग सबै जिल्लामा कयौँ दिनदेखि बन्द भइरहेको छ। कतिपय स्थानमा हिं‌सात्मक झडप भएका छन्। तर त्यसलाई राजनीतिक रुपमा सम्बोधन गर्नुको साटो शीर्ष नेताहरु सीमाङ्कन टुङ्गो आज लगाउने भोलि लगाउने भन्दै बैठक लम्ब्याइरहेका छन्। सीमाङ्कन बिनाको स‌ंविधान ल्याउन खोज्दा पनि सर्वोच्चको फैसला र राष्ट्रपतिको दबाब थियो। असन्तुष्टलाई वार्तामा ल्याउनुको साटो पेलेरै लैजाने नीतिमा सरकार देखिएको छ। स्थिति भडकिँदै गयो भने त्यसले झन् नोक्सान मात्रै गर्ने हो।