कहिले मनाउने त संविधान दिवस ?

नेपालीहरु विदाका साह्रै भोका हुन्छन्। जति विदा भए पनि पुग्दै नपुग्ने। यो हप्ता सात दिनमा तीन दिन विदा दुई दिन बन्द भयो। एक दिन इद, दुई दिन संविधानको सुझाव बटुल्न विदा र दुई दिन राप्रपा नेपाल र विप्लव माओवादीको पालैपालो बन्द। यत्रो विदा हुँदा पनि अझै विदा भइदिए हुन्थ्यो भन्ने मनमा लागिरहेकै हुन्छ केहीलाई। एउटा यस्तै विदा पाइने दिन हो संविधान दिवस। यो दिवसको विदा नभएको धेरै भइसक्यो। किनभने संविधानै थिएन। २०४७ सालको संविधान लागू भएको दिन कात्तिक २३ गतेलाई त्यसपछिका वर्षहरुमा संविधान दिवसका रुपमा मनाउन थालियो। त्यसअघि पुस १ गते पञ्चायति संविधान दिवस मनाइन्थ्यो। गणतान्त्रिक संविधान दिवस चाहिँ जेठ १४ मा मनाउने तयारी थियो। तर संविधान जारी हुन नसकेर संविधान सभा नै भंग भयो।

दोस्रो संविधान सभाले माघ ८ गते संविधान दिवस बनाउने तयारी गरेको थियो। तर त्यो पनि सफल हुन सकेन। अब यसो चालामाला हेर्दा भने साउन महिनामा संविधान दिवस जुर्ला जस्तो देखियो। साउनको स र संविधानसको स पनि मिल्ने।

शुक्रबार चार दल प्राइभेट लिमिटेडको बैठक बालुवाटारमा बसेको थियो। बैठकमा जनताको सुझावलाई समेटेर साउन २० गतेसम्म संविधान जारी गर्ने विषयमा छलफल भएको रहेछ। यो महिना ३२ गतेसम्मको छ। भनेपछि भावी संविधान दिवस साउन २० गतेदेखि ३२ गतेभित्रका कुनै पनि दिन हुनसक्ने देखियो।

यो अवधिमा कुनै चाड पनि छैनन्। साउन २७ गते काठमाडौँमा मनाइने गठेमंगल चाड रहेछ। कुन दिन संविधान दिवसको साइत जुर्ने हो, हेर्न बाँकी छ।

संविधान जारी भएको सात दिनभित्र भने भने नयाँ प्रधानमन्त्री देशले पाउनेछ। यो सम्बन्धी व्यवस्था संविधानको संक्रमणकालीन व्यवस्थामा स्पष्टसँग गरिएको छ। त्यसैगरी सभामुख २० दिनभित्र नयाँ चुनिनेछ भने राष्ट्रपति र उपराष्ट्रपति १ महिनाभित्र नयाँ आउनेछ।